KORINTHTE I 16
16
Jerusalem kouhtuam a migentheite diing a thohlawm don thu
1Huleh misiangthoute diing a thohlawm thu chu, Galatia gam a kouhtuamte thu ka piah bangin nangun zong bawl un. 2Ka hung chiang a thohlawm donna a um louhna diingin, ni sagihni masapenin Pathian in a vangpiah bangin mi chinin na khut vah na koih khawl chiat un. 3Huleh ka hung chiangin, koi hitaleh pha na sahsah uh na silpiah uh va thah diingin na lehkha u’toh Jerusalem ah ka sawl diing hi. 4Huleh kei zong ka chiah a lem leh, kei toh kitonin a chiah diing uhi.
Thutawpna leh mangpha haahna
5Makedonia gam ka totsuaah zoh chiangin na kawmvah ka hung diing hi, ajiahchu Makedonia gam totsuaah ka sawm hi. 6Huleh ka chiahna diing photmaha na hung thah leh theihna diingun na kawmvah tomkhat, ahihlouhleh phalbi sung siah aha ka taam meithei hi. 7Ajiahchu tua zin kawma hung muh malam ka ut sih hi; hizongleh Lalpa’n lem a sah leh sawtdeuh na kawmva taam ka kinem hi. 8Hizongleh Pentikost dongin Ephesa khua ah ka taam diing hi. 9Ajiahchu kot lianpi leh phatuamtah kei diingin a kihong a, doutute zong tampi a um uhi. 10Huchi'n Timothi a hung a ahihleh, lauthawng lou a na lahva a um theihna diing ngaihtuah un; ajiahchu kei tobangin ama’n Lalpa nna a tong hi. 11Hujiahin koima’n musit sih henla; ka kawma ahung theihna diingin lungmuangtahin ha zaw un; ajiahchu unaute toh ka kawma ahung uh ka kinem hi. 12Unaupa Apollo thu ahihleh, unaute toh na kawmva hung diingin ka deih mahmah a; hizongleh tutaha hung diing chu amah deihdan ahi sih hi; hizongleh hun lemtaang a neih chiangin ahung diing hi. 13Kiveeng unla, ginna ah dingkip un, pasalpha bangin um unla, haattahin um un. 14Na silbawl photmah uh lungsiatna a bawl hi heh. 15Unaute, (Stephana innkuanpihte chu Akaia gam a, Pathian thu a gah masapen ahi va, misiangthoute natohsah diingin a kipia uh chih na he uhi), 16Huchibangte kawm a leh mi chin keiuh toh huhna a tonggimte kawma kituluut diingin ka hung ngen hi. 17Stephana leh Fortunata leh Akaika hung chu ka kipaah hi; ajiahchu amahun na um louh awng uh a hu uhi. 18Bang jiahin ahiai i chih leh amahun kei lungsim leh nanguh lungsim ahung suhhalhsah uhi; hujiahin huchibang mite chu hesiam un. 19Asia gam a kouhtuamte’n chibai ahung buuh uhi. Akuila leh Prisilla in a inn va kouhtuam kikhawmte toh Lalpa ah chibai hoihtah ahung buuh uhi. 20Unaute zousiah in chibai ahung buuh uhi. Tawp siangthouin khat leh khat chibai kibuuhtuah un. 21Kei Paul in keimah khut ngei a chibai ka hung buuhna ahi. 22Mi koipouh in Lalpa Jesu Khrist a lungsiat louhleh haamse thuaah in um heh. (Anathema), Lalpa ahung hi. (Maranatha). 23I Lalpa uh Jesu Khrist hehpihna na kawmvah um hen. 24Khrist Jesu a ka hung lungsiatna na bawnva kawmah um hen. Amen.
Currently Selected:
KORINTHTE I 16: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.