KORINTHTE I 2
2
Pilna leh kilaahna kikhiahna
1Huleh unaute, kei chu na kawmva Pathian thu heetsahna phuang a ka hung laiin thusoi siamna mahmah leh pilna loupitah toh hung ka hi sih hi. 2Bang jiahin ahiai i chih leh ke’n Jesu Khrist leh, amah kilhbeh a um thu chauhlou chu na lahvah bangmah dang heet ka tum sih hi. 3Huleh kei chu haatlou leh lau in, nasataha kithing kawmin na lahvah ka um a. 4Ka kamsuaahte leh ka thusoite chu mihing pilna a zawlsiamna thu ahi sih a, Hagau leh silbawltheihna a suhlat in ahi zaw hi. 5Huchia na ginna uh mihing pilna a kinga loua, Pathian silbawltheihna a, a kingah zawhna diingin. 6Ahiinlah pichingte lahah chu pilna thu zong ka soi jel uhi, ahihvangin hi khovel pilna thu ahi sih a, hi khovel vaihawmtu mangthai diingte pilna thu zong ahi sih hi. 7Hizongleh kei un chu Pathian pilna thuguuh, i loupina diing a Pathian in khovel um ma a, a guatsa pilna kiphual thu chu ka soi zaw veu uhi. 8Huchu hi khovel vaihawmtute mawngmawngin a he sih uh; ajiahchu na he hitaleh uh loupina Lalpa chu ana kilhbeh sih diing uhi. 9Hizongleh, Mit a muh ngei louh, bil a jah ngei louh, huleh mihing lungtang a zong luut ngei lou, Pathian in amah lungsiatte diing a, a bawlsah silte chu, chia gelh bangin. 10Hizongleh Pathian in hute chu a Hagau in i kawmah ahung hesahta hi; ajiahchu Hagau in bangkim a hawldoh veh a, ahi, Pathian thugilte zong. 11Mihing thute mihinga um hagau loungalin kua’n ahiai he diing? huchimahbangin Pathian thute zong Pathian Hagau loungalin kuamah in a he sih hi. 12Huchi'n Pathian in a thawn a ahung piah silte i heettheihna diingin, ei unchu khovel hagau hilou in, Pathiana kuan Hagau chu i tang uh ahi. 13Hu silte chu mihing pilna thuhilhna thu a soi louin, Hagau Siangthou thuhilh chu soi zaw in, hagaulam thute hagaumite kawm a hilhchianin i soi veu uhi. 14Hizongleh khovel mi’n chu Pathian Hagau lam silte a pom thei sih hi, ajiahchu amah ngaihin hute chu ngolhuai ahi; Hagaua heet ahihjiahin he zong a he thei sih hi. 15Hizongleh hagau mi’n chu sil zousiah a hechian veu a, amah ahihleh kuama’n a hechian sih hi. 16Ajiahchu amah thuhilh thei diing a kua’n ahiai Lalpa lungsim heta? Hizongleh eiun chu Khrist lungsim i pua uhi.
Currently Selected:
KORINTHTE I 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.