KORINTHTE I 1
1
Chibaibuuhna leh kipaahthusoi na
1Paul, Pathian deihna jala Jesu Khrist sawlleh diing a kouh leh, i unaupa uh Sostheni in, 2Korinth khua a Pathian kouhtuam umte, Khrist Jesu a suhsiang, misiangthou diing a kouhte kawmah, gam china i Lalpa (amahuh leh eite Lalpa) Jesu Khrist min lou zousiah kawmah toh; 3I Pa uh Pathian leh Lalpa Jesu Khrist kawma kipan, hehpihna leh hamuanna na kawmvah um hen. 4Jesu Khrist a Pathian hehpihna na kawmva kipia jiahin na tung thu vah Pathian ka paahtawi zing hi; 5Silbangkim ah thusoi theihna chinteng leh, heetna chinteng ah amah vangin suhhauhsat in na um uhi. 6Huchibangin Khrist thu heetsahna chu nanguh ah suhkip ahita hi. 7Huchi'n silpiah mawngmawng ah na lohsapna uh um lou in; i Lalpa uh Jesu Khrist hung kiitna diing ngaah a um zing na hi uhi. 8Ama’n i Lalpa uh Jesu Khrist ni chianga soiselbei a na um theihna diingun a tawp dongin zong ahung sukip diing hi. 9Pathian chu a muanhuai hi, ama’n a Tapa Jesu Khrist i Lalpa uh kipawlkhawmna ah nanguh ahung kou luutta hi.
Kouhtuam sung apat kikhenna
10Huleh unaute, na bawnva thu khat na soi va, huleh na lahva kikhenna mawngmawng a um louhna diingin lungsim kikhat leh ngaihtuahna kibang a hoihtah a na kizop zawhna diingun Lalpa Jesu Khrist minin ka hung ngen hi. 11Ajiahchu ka unaute, na lahvah kikhinna a um chih na tungtaang thu uh Kloe innkuanpihte soina ah ka ja hi. 12Ka soi chu hikhu ahi, nanguh michin in, Kei chu Paul lawi ka hi; kei Apollo lawi ka hi; kei Kipha lawi ka hi; huleh kei Khrist lawi ka hi, na chi uhi. 13Khrist hawmkhen in a um eimah? Paul nanguh diingin kilhbeh in a um eimah? ahihlouhleh Paul minin baptisma na tang viai mah? 14Krispa leh Gaia chih louh na lahva khatbeeh ka hung baptis louh jiahin Pathian kawmah kipaahthu ka soi hi. 15Huchilouin chu keimah mina ka baptis ahi chi a umkha diing uhi. 16Huleh Stephana innkuante zong ka baptis a, hute lou chu midang ka baptis lam ka he sih hi. 17Ajiahchu Khrist in baptis diingin ahung sawl sih a, tanchinpha soi diingin ahung sawl zaw hi; pilna thu a soi lou in, huchilouin chu Khrist kros bangmahlou a suaahkha diing hi. 18Bang jiahin ahiai i chih leh kros thu chu mangthaite diingin ngolhuai ahi a; hizongleh eiuh hutdam a umte diingin chu Pathian silbawltheih na ahi. 19Ajiahchu, Mipil pilna ka suse diing a, lemhetu lemheetna ka sumang diing hi, chih gelh ahi. 20Mipil khoi ah ahiai? lehkhagialtu khoi ah ahiai? hi khovela nialhaat mi khoi ah ahiai? Pathian in hi khovel pilna ngolhuai a suaahsah sih eimah? 21Ajiahchu Pathian pilna ah, khovel in pilna zanga Pathian a heet louh nungun, thusoi ngolhuai zanga, a gingtate hutdam chu Pathian in pha a sa hi. 22Judate’n chiamchihna a ngeeh va, Grikte’n pilna a hawl uh. 23Hizongleh eiun chu Khrist kilhbeh thu i soi uhi, huchu Judate diingin puuhna, huleh Grikte diingin ngolna ahi. 24Hizongleh Judate hiin, Grikte hitaleh kouhte diingin chu, Khrist chu Pathian silbawltheihna leh Pathian pilna ahi. 25Ajiahchu Pathian ngolna mihing sangin a pilzaw a, huleh Pathian haat louhna zong mihing sangin a haatzaw hi. 26Bang jiahin ahiai i chih leh unaute, kouh na hihna uh ngaihtuah dihvua, tahsalama mipil tampite, mihaat tampite, mi lian tampite kouh ahih louhdan uh; 27Hizongleh Pathian in mipilte a zahtaatsah na diingin khovel sil ngolte a teel zota a; huleh sil haatte a zahtaatsah na diingin khovel sil haatloute a teel zota hi; 28Huleh khovel sil sia leh sil muhsithuaite Pathian in a teel a, ahi, sil um lou tanin a teel a, sil umte bangmahlou a suaahsah theihna diingin; 29Huchi'n Pathian ma ah kuamah a kiuangsah thei sih diing hi. 30Hizongleh nang u’chu amah vangin Khrist Jesu ah na um uhi, amah chu Pathian apat eiuh diing a pilna, dihtatna, suhsiangthouna, huleh tatdohna diing a bawl ahi; 31Huchi'n a kigial bangin, A ki suang phot chu Lalpa ah ki suang heh.
Currently Selected:
KORINTHTE I 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.