ROMETE 16
16
Paul chibai buuhna
1Kenkria khua a kouhtuam natongtu, i sanggamnu uh Phoibi na kawmvah ka hung meelheetsah hi; 2Lalpa mina misiangthoute bangmaha nana pom va, na panpih uh a ngaihna photmaha na panpih diingun; ajiahchu ama’n zong mi tampi ana panpihta a, keimah ngei zong ahung panpihta hi. 3Khrist Jesu a hung panpihte Prisilla leh Akuila chibai hung buuhsah un. 4Amahun ka hinna a diingin a ngawng uh a dohta uh a; amahuh tung chauh ah hilouin, Jentel kouhtuam zousiahte tungah zong kipaahthu ka soi hi. 5Huchimahbangin a inn va kouhtuam kikhawmte zong chibai hung buuhsah un. Akaia gam a Khrist a gah masapen, ka deihtah Epainita chibai hung buuhsah un. 6Na lahva tonggim Mari chibai hung buuhsah un. 7Ka chipihte laha ka koltaanpih, sawlleh laha minthangtah, Khrist a zong kei sanga um masazaw Andronika leh Junia chibai hung buuhsah un. 8Lalpa a ka deihtah Amphlia chibai hung buuhsah un. 9Khrist a i natohpih Urba ne leh, ka deihtah Staki chibai hung buuhsah un. 10Khrist a mi tahzet Apelli chibai hung buuhsah un. Aristobala innkuana mite chibai hung buuhsah un. 11Ka chipih Herodion chibai hung buuhsah un. Lalpa a um Narkissa innkuan a mite chibai hung buuhsah un. 12Lalpa a natong, Triphena leh Triphosa chibai hung buuhsah un. Lalpa a na hahtoh mahmah, deihtah Persi chibai hung buuhsah un. 13Lalpa a teel, Rufa leh a nu, kei nu zong hive, chibai hung buuhsah un. 14Asinkrita, Phligon, Herma, Patroba, Hermi, huleh a kawmva um unaute chibai hung buuhsah un. 15Philologa leh Julia, Neria leh a sanggamnu, huleh Olimpa leh a kawmva misiangthou umte zousiah chibai hung buuhsah un. 16Tawp siangthou in chibai kibuuhtuah un. Khrist kouhtuamte’n chibai ahung buuh uhi. 17Huleh unaute, kihilhna daan nanguh hung kihilh louh zawng a kikhenna leh puuhna siamdohtute meelchih diing leh kiheisan diingin ka hung ngen hi. 18Bang jiahin ahiai i chih leh hutobang mite’n i Lalpa uh Jesu Khrist nna a tong sih va, amahuh gilpi nna a tong zaw uhi; huleh kampha leh kamsia min mimawlte lungsim a heem veu uhi. 19Ajiahchu na thumandan uh mizousiah lahah a kithangta a; hujiahin na tungvah ka kipaah hi; hizongleh silhoih lama na pil va, silgilou lama na mawl uh ka deih hi. 20Huleh hamuanna Pathian in Setan chu tomkal louin na keeng nuaivah ahung tuandeensah diing hi. I Lalpa uh Jesu Khrist hehpihna na tungvah um hen. Amen. 21Ka natohpih Timothi leh ka chipihte Lusia, Jason, huleh Sosipater in chibai ahung buuh uhi. 22Keimah Tertia, Hi lehkhathot gialpa in Lalpa minin chibai ka hung buuh hi. 23Gaia, kei leh kouhtuam zousiah zintunna pa in chibai ahung buuh hi. Khosung sumkoltu Erasta leh unaupa Kuarta in chibai ahung buuh uhi. 24I Lalpa uh Jesu Khrist hehpihna na bawnva tungah um hen. Amen.
Thu khaahna
25Tuin amah, ka tanchinpha leh Jesu Khrist thu kitaangkoupihna banga, thuguuh kiphual kiphuandohna dungjui a, hu thuguuh kiphual chu khovel siam chiil akipana phual a um, 26Hizongleh tua kumtuang Pathian thupiah dungjuia zawlneite lehkhathu in, ginna thumanna diinga nam zousiah kawma a suhlat leh heetsaha um dungjui a nanguh hung sukip theipa, 27Pathian pil chauh kawmah, Jesu Khrist jalin kumtuang in loupina um hen. Amen.
Currently Selected:
ROMETE 16: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.