ROMETE 15
15
1Huchi'n ei a haatte’n eimah nopna diing hawl louin, a haatloute haat louhna i thuaahpih diing uh ahi. 2Mi chinin i innveengte khantouhna diing a, a hoihna diingun i sulungkim diing uhi. 3Ajiahchu Khrist in zong amah nopna diing a ngaihtuah sih a, hizongleh, Ahung taite taina chu ka tungah a tuta hi, chia gelh bangin ahi zaw. 4Ajiahchu malaia ana kigial photmah chu, Pathian lehkhathu a kuhkalna leh hamuanna jala eite’n kinepna i neihtheihna diing a eiuh kihilhna diing a gelh ahi. 5Huchi'n kuhkalna leh hamuanna Pathian in Khrist Jesu mahbangin khat leh khat lungsim kibang nei in hung umsah hen; 6Pathian; i Lalpa uh Jesu Khrist Pa ngei chu lungsim munkhat pua leh aw khat suah a na paahtawi theihna diingun. 7Huchihjiahin Khrist in zong Pathian loupina diing a ahung kipaahpih mah bangin khat leh khat kipaahta chiat un. 8Bang jiahin ahiai i chih leh, pulepate kawma thuchiamte sukip diingin Khrist chu Pathian thudih heetsahna diingin zehtante thunatongtu ahung hita hi chitu ka soi ahi. 9A khotuahna jiaha Jentelte’n Pathian a paahtawi theihna diingun; Hikhu jiahin Jentelte lahah ka hung paahtawi diing a, na min phatin la ka sa diing hi, chih gelh bangin. 10Huleh, Nanguh Jentelte, ka mite toh kipaah un, a chikiit a. 11Huleh, Nanguh Jentelte zousiah, Lalpa chu paahtawi un; mi zousiah in zong amah phat un, a chi kiit a. 12Huleh Isaiah in, Jesse zungjam a um diing a, Jentelte tunga vaihawm diing a hung diingpa a um diing; amah chu Jentelte’n a kineppih diing uh, a chikiit hi. 13Hagau Siangthou silbawltheihna jiaha kinepna na hauh theihna diingun kinepna Pathian in ginna a kipaahna leh hamuanna chintengin hung sudim hen.
Paul in a natohna leh a khualzinna diing a soina
14Huleh ka unaute, nanguh chu hoihna in na dim va, pilna kim nei in na kihasuantuah thei uh chih kei mahmah in zong ka he hi: 15Ahihvangin unaute, Pathian in ahung piah hehpihna jiahin nanguh hung heetdoh sahna tobangin a kal lahlah ah haangsantahin ka gial ahi. 16Jentelte kawmah Jesu Khrist thunatongtu ka hihtheihna diing leh, ka Jentel latte Hagau Siangthou a suhsiangthou ahih va, kipaahpih taah ahihtheihna diingun Pathian tanchinpha nna ka tong hi. 17Hujiahin Pathian lam silte ah Jesu Khrist ah kiloupisahna diing ka nei ahi. 18Ajiahchu Khrist in Jentelte thuawisah diing a thusoi leh natoha keimah zanga a silbawlte loungal bangmah ka soi ngam sih hi, 19Chiamchihna leh silmahte in Pathian Hagau silbawltheihna in; huchi'n Jerusalem khua leh a kimvel gam a kipan Illirikam gam tanphain Khrist tanchinpha kimtahin ka soi zouta hi. 20Ahi, midang innbulphuhsa tunga inn bawl ka hih louhna diingin, tanchinpha chu Khrist min kilohnasa mun a soi louin; 21Himahleh a tanchin soi ngei louhnate’n a mu diing a; a ja ngeiloute’n ahung he diing uh, chih gelh bangin soi ka tum zaw hi. 22Hukhu jiahin na kawmva hung diing tampi vei daal in ka umta hi. 23Hizongleh tuin chu hi gam kimvel ah mun ka neita sih a, huleh kum tampi na kawmva hung nuamin zong ka umta hi. 24Spain gam a ka chiah hunhun chu na kawmvah ka hung diing hi; ajiahchu ka zinna a nanguh hung muh leh, nanguh hung kithuahpih chim phot leng, hu lam ka chiahna ah nangun na hung haah u’zong ka kinem hi. 25Hizongleh tuin chu misiangthoute natohsah diingin Jerusalem a chiah phot diing ka hi. 26Ajiahchu Makedonia leh Akaia gam a mite’n Jerusalem khua a misiangthoute laha tagahte a diing a sum thohkhawm pha a sata uhi. 27Ahi, lungkimtahin ahih uhi, huleh a leiba uh zong ahi mawng uhi. Ajiahchu Jentelte’n a hagaulam silte uh a kikoppih ngal unchu, tahsalam silte a amah uh a panpih ve uh chu ahih diing mawng uh ahi. 28Hujiahin hi ka bawl zoh a, gah zong chiantaha ka muhsah zoh chiangin nanguh hung tawnin Spain gam ah ka chiah diing hi. 29Huleh na kawmva ka hung chiangin Khrist tanchinpha vangpiahna kim toh ka hung diing chih ka he hi. 30Huchi'n unaute, Pathian kawma na hung haamteisahna vah chihtahzeta hung thuaahpih diingin Lalpa Jesu Khrist min leh Hagau Siangthou lungsiatna in ka hung ngen hi. 31Judia gam a gingloute laha ka suahtaat theihna diing leh, Jerusalem khua a diing a ka natohna hi misiangthoute kipaahna zawng ahihtheihna diingin; 32Pathian deihzawng bang a, kipaahtaha na kawmva ka hunga, i kisuhhalhkhawm chiat theihna diingun. 33Ha muanna Pathian na bawnva kawmah um hen. Amen.
Currently Selected:
ROMETE 15: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.