KORINTHTE I 4
4
Pathian lama sawllehte mohpuahna
1Huchi'n mi’n kei u’chu Khrist thunatongtute leh Pathian thuguuh enkoltute bangin hung he u’heh. 2Hi-ah enkoltu hihna a’chu mi ginum hih a poimoh hi. 3Hizongleh nangun na hung etkhiah va, mihing ngaihtuahna a na hung etkhiah uh chu kei diingin sil neutakhat ahi; ahi, kei leh kei zong ka kienkhe sih hi. 4Ajiahchu keimah in bangmah ka he sih hi; ahi’nla huin siam ka kitangsah ahi tuan sih; hizongleh ahung enkhetu chu Lalpa ahi hi. 5Hujiahin a hun ma in, Lalpa hung masiahin, bangmah enkhe sih un, ama’n chu mial a sil kiphualte vaah ah ahung podoh diing a, huleh lungtang a ngaihtuahte zong ahung sulang diing hi; hu hun chiangin michin in Pathian phatna a tang chiat diing uhi. 6Huleh unaute, a kigial bang val a koimah ngaihtuah louh diing chih keiuh apat na zil theihna diing uleh, na lahva kuamah in khat suang a khat na uahsah louhna diingun, hi thute chu nanguh vangin Kei leh Apollo etsahna in ka kipia hi. 7Ajiahchu kua’n ahiai nang midang apat hung tuamsah? huleh ahung kipe lou bang ahiai na neih? huchi'n mi piah a nei na hih leh, bang diinga a kipe lou banga kisathei na hiai? 8Tuin na vahta va, tuin na hausata uh, keiuh louin lal bangin vai na hawmta uhi; kei un zong nang u’toh vai ka hawm ve theihna diingun tahtah a vaihawm hileh u’chin ka ut hi. 9Pathian in keiuh sawllehte hi si diing a guatsa bangin a nunungpen a hung koih hiin ka ngaihtuah hi; hujiahin khovel leh, angelte leh, mihingte mitmuh a etnop silin ka um uhi. 10Kei u’chu Khrist jiahin mingol ka hi va, nang u’chu Khrist ah mipil na hi uhi; Kei u’chu ka haat sih va, nanguh, chu na haat uhi; nang u’chu na zahum va, kei u’chu simmoh in ka um uhi. 11Tu daahkal dongin ka gilkial un ka dangtaah va, saguah in ka um va, mi khutthah nuulna ka hi uh, teenna mumal bei in ka um uhi; 12Huleh ka khut va nna tongin ka gim mahmah uh; housiat a ka um un ka vangpiah va; sawih a ka um un ka thuaah teitei uhi. 13Soisiat a ka um un ka zawllungdam va; tuni tanin zong khovel niinnoh, sil zousiah bolhhoh bangin bawl in ka um uhi. 14Na zahtaatna diingun hi thute ka gial ahi sih a, ka ta deihtahte bangin ka hung hilhkhawl ahi zaw hi. 15Ajiahchu nangun Khrist ah hilhtu saang sawm nei zongleh u’chin, pa chu tampi na nei sih uhi; bang jiahin ahiai i chih leh tanchinpha jalin Khrist Jesu ah nanguh ka hung hingkhia hi. 16Huchihjiahin ka umdan juitute hi diingin ka hung ngen hi. 17Hikhu diing jiahin Lalpa a ka ta deihtah leh ginum. Timothi na kawmvah ka hung sawl hi; ama’n chu gam china kouhtuamte ka hilh veu bangin, Khrist a ka umdante nanguh ahung hedohsah kiit diing hi. 18Na kawmva hung nawnlou diing banga hung na ngaihtuahin khenkhat nana kiuangsah uh. 19Hizongleh Lalpa’n lem a chihleh na kawmvah ka hung baih diing hi, huchi'n kiuangsahte chu a thusoi uh hilou in, a silbawltheihna uh ka heta diing hi. 20Ajiahchu Pathian gam chu thu ah a um sih a, silbawltheihna ah a um zaw hi. 21Bang ahiai na deih zawh uh? na kawmvah chiang tawiin ka hung diai, ahihlouhleh lungsiatna leh lungnemna hagau toh ka hung diai?
Currently Selected:
KORINTHTE I 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.