KORINTHTE I 5
5
Aangkawmna sual thu a hilhna
1Na lahvah kingaih a um chih a thang vengvung hi, huchibang kingaih Jentelte laha zong um ngeilou, mi khat in a pa ji a kiteenpih, chih. 2Huleh huchibang silbawlpa chu na lah vapata nohdoh diing a lungngaih naahsangin na kiuahsahpih zaw uhi. 3Ajiahchu keimah tahsa a ka tel louh vangin ka hagau in ka tel a, hutobanga gamtapa chu na lahva tel tobangin a tungvai ka hawm zouta hi. 4I Lalpa uh Jesu Khrist minin, ka hagau leh i Lalpa uh Jesu Khrist silbawltheihna toh na kikhopkhawm chiangun, 5Huchibang mi chu Lalpa Jesu ni chianga a hagau hutdam a, a um theihna diingin, a tahsa suhmangna diingin Setan kawmah piah diing ka chi hi. 6Na kisahtheihna uh a hoih sih hi. Tol themchakhat in tanghou beu a pum in a zelsuaah veu hi chih na he sih u'maw? 7Hujiahin tol sohlouh na hih bangmahun, tanghou beu thah na hih theihna diingun tol lui chu paaisiang un. Bang jiahin ahiai i chih leh ei di’n i chiahkaan uh Khrist chu goh in a umta hi. 8Hujiahin gual vaahna nei nihang, tol lui toh chu hilou in, nunsia leh giitlouhna tol toh zong hilou in; hizongleh tahna leh dihna tanghou tol sohlouh toh i nei zaw diing uhi. 9Ka lehkhathot ah kingaihhaatte kithuahpihlou diingin ka hung gial hi. 10Hi khovela kingaihhaatte toh aha, mi huaihamte toh aha, leepgute toh aha, ahihlouhleh milem bete toh aha kithuah heet louh diing chi chu ka hi sih hi; ajiahchu huchi diing hileh khovel apat na chiahdoh uh ngai diing ahi. 11Hizongleh tuin chu, koipouh unau chih hi ngal a kingaih haat aha, huaiham aha, milembia aha, haansan aha, zukham haat aha, a hihlouhleh leepguuh haat aha ahih inchu amah chu kithuahpih lou diingin na kawmvah ka hung gial hi; huchibang mi toh neeh zong nekhawm lou diingin. 12Ajiahchu polam mite ke’n ka ngaihtuah khawh diing bang awm ei? a sunga umte hilou maw nangun na ngaihtuah veu uh? 13Hizongleh polam a mite chu Pathian in a ngaihtuah veu hi. Hujiahin na lah vapatin hu migiloupa chu nohdoh un.
Currently Selected:
KORINTHTE I 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.