KORINTHTE I 6
6
Khristiante diing a kiheeh awi louh
1Na lahva koipouh in midang tungah thubuai nei taleh uchin misiangthoute ma a tut louin, mi dihtatloute ma ah na tut ngam diviai mah? 2Misiangthoute’n khovel vaihawm diing ahi uh chih na he sih viai mah? huleh khovel vaihawm diing na hih uleh, sil neupente vaihawm diing a taahlou na hi u'maw? 3Angelte vaihawm diing i hi chih na he sih viai mah? huchi a hih inchu hi damsung silte giap i vaihawm talo mahmah diing uhi. 4Huchi ahihleh hi damsung silte vaihawm diing na neih un, kouhtuam laha mi simmohhuaipente vaihawm diingin tousah un. 5Na zumna diingun ka soi ahi. Na lahvah mipil khatbeeh um lou ahiai mah? khat beeh a unaute kikala vaihawm thei um lou ahiai mah? 6Hizongleh unau in unau na heeh va, huzong gingloumi ma ah ahi nalai hi. 7Huchi ahihjiahin khat leh khat na kiheehtuah uh hi na khelhna lianpi uh ahi. Bang diinga kimohsah zaw mei lou na hi viai? bang diinga a heem a bawlna thuaah zaw mei lou na hi viai? 8Hilou, nanguh mahin na bawlsual va, na heem uh, huleh huzong na unaute uh tungah ahi na bawl uh. 9Mi dihtatloute’n Pathian gam a luah sih diing uh chih na he sih viai mah? Heem in um sih un; kingaihhaatte aha, milem bete aha, aangkawmte aha, mihuuhte aha, tohuuhte aha, 10Gutate aha, huaihamte aha, zukhamhaatte aha, mi salhhaatte aha, ahihlouhleh leepgute aha in Pathian gam a luah sih diing uhi. 11Huleh na lahva khenkhat huchibang nana hi uh; hizongleh Lalpa Jesu Khrist min leh, i Pathian uh Hagaua silsiang na hita uh, suhsiangthou na hita uh, siamtansah na hita uhi.
Sil sianglou bawl leh Khristian hindan kituaahlouhna
12Sil zousiah kei diingin bawl a sianga, hizongleh sil zousiah bawl a hoih kim sih; sil zousiah bawl kei diingin a sianga, hizongleh bangmah silbawltheihna nuaiah ka um sih diing hi. 13Ante chu gilpi a diing ahi a, huleh gilpi zong an a diing ahi; hizongleh a nihin Pathian in a sumang diing hi. Huleh sapum chu kingaihna diing ahi sih a, Lalpa a diing ahi zaw hi; huleh Lalpa chu sapum a diing ahi. 14Pathian in Lalpa chu a kaithou a, huleh eiuh zong a silbawltheihna in ahung kaithou diing hi. 15Na sapum uh Khrist hiangte ahi chih na he sih viai mah? Ahihleh Khrist hiangte chu la in nohchizuahte hiangin ka bawl diing ahiai mah? Bawl lou hial diing. 16Ahihleh, nohchizuah toh kizop photmah chu pumkhat ahi uh chih he lou na hi viaimah? ajiahchu ama’n, A nih un pumkhat ahita diing uh, a chi hi. 17Hizongleh Lalpa toh kizop chu hagaua amah toh pumkhat ahi uhi. 18Kingaih taisan un. Mihing sualna zousiah chu sapum polam ahi; hizongleh kingaihna sual bawl in chu amah sapum tungah sil a bawl sual ahi. 19Ahihleh, na sapum u’chu, na sung va um, Pathian a kuan a na muh uh, Hagau Siangthou inn ahi a, nanguh a zong na hi sih uh chih na he sih viai mah? 20Ajiahchu mana lei na hi uhi: hujiahin na sapum uleh, na hagau vah, Pathian paahtawi un, huchu Pathian a ahi.
Currently Selected:
KORINTHTE I 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.