JOHN I 5
5
Ginna: khovel zohna
1Mi koipouh Jesu chu Khrist ahi chih gingta chu Pathian a piang ahi; huleh koipouh a hingtu lungsiat inchu a hin zong a lungsiat veu hi. 2Hikhu in Pathian tate i lungsiat uh chih i he, Pathian i lungsiat a, a thupiahte i juih chiangin. 3Bang jiahin ahiai i chih leh, Pathian i lungsiatna u’chu a thupiahte i juih uh ahi; huleh a thupiahte chu a khauh sih hi. 4Pathian a piang photmahin khovel a zou hi; huleh hikhu ahi khovel tunga gualzohna chu, i ginna ngei uh. 5Jesu Pathian Tapa ahi chih gingta mi chauh loungal koi ahiai khovel tunga gualzou? 6Hi ahi tui leh sisana hung chu, Jesu Khrist ngei; tui chauh a hilou in, tui leh sisanin ahi zaw. Huleh heetpihtu chu Hagau ahi, Hagau chu thutah ahih jiahin. 7Ajiahchu vaan ah heetpihtu thum a um hi, Pa, Thu, huleh Hagau Siangthou; huleh hi thumte chu khat ahi. 8Huleh leitung ah heetpihtu thum a um hi, Hagau, tui, huleh sisan; hi thumte chu khat in a kituaah uhi. 9Mihing heetpihna bawn i pom inchu, Pathian heetpihna a loupizaw hi; ajiahchu a Tapa tungthu a, a heetsah Pathian heetpihna chu hikhu ahi, 10Koipouh Pathian Tapa gingta in amah ah heetpihtu a nei hi; Pathian gingta lou mi’n chu amah mi zuau ahisah hi; Pathian in a Tapa ahung piah thu a heetsah a gintaat louh jiahin. 11Huleh heetsahna chu hikhu ahi, Pathian in kumtuang hinna ahung peta a, hu hinna chu a Tapa ah a um hi. 12Koipouh Tapa nei in hinna a neita, koipouh Pathian Tapa nei louin hinna a nei sih hi. 13Kumtuang hinna na neita uh chih na heetna diingun, nanguh Pathian Tapa min gingtate kawmah hi thute ka gial ahi huleh Pathian Tapa min na gintaat theihna diingun. 14Huleh amah a i kimuanna u’chu hikhu ahi, bangpouh amah deihzawng a i nget leh ahung ngaikhe veu hi, chih. 15Huleh bangpouh i nget uh ahung ngaihkhiahsah chih i heet inchu, a kawm a i silnget uh i muta chih i he uhi. 16Mi koipouh in a unau, sihna khop hilou sual bawl a a muh inchu a ngetsah diing a, huchi'n Ama’n sihna khop hilou sual bawlte diingin hinna a pe diing hi. Sihna khop sual a um a; hukhu diingin a ngetsah diing ka chi sih hi. 17Dihtatlouhna zousiah sual ahi; huleh sihna khop hilou sual zong a um hi. 18Koipouh Pathian a piang chu a sual zing sih chih i he hi; hizongleh Pathian a piangpa in amah a kikola migiloupa’n a khoihkha sih hi. 19Eiuh chu Pathian a kuan i hi chih leh, khovel pumpi chu gilou in a um chih i he uhi. 20Huleh Pathian Tapa chu a hungta a, amah Midihtah chu i heet theihna diingin heetsiamna ahung peta chih i he uhi; huleh eihaw chu amah Midihtah, a Tapa Jesu Khrist ngei ah i um uhi. Amah chu Pathian dihtah leh kumtuang hinna ahi. 21Tate haw, milem apat kihemkhia un. Amen.
Currently Selected:
JOHN I 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.