PETER I 1
1
Chibaibuuhna
1Peter, Jesu Khrist sawllehin, Ponta gamte, Galatia gamte, Kappadosia gamte, Asia gamte leh Bithinia gamte a kithehdalh mi vaithaamte, 2Thumang diing leh, Jesu Khrist sisan theh tang diing a Hagau hihsiangthou jala Pa Pathian heetlawhna dungjui a teelte kawmah Hehpihna leh hamuanna na kawmvah suhkhang in umta hen.
Hutdamna kinepna thu a Khristian kipaahthusoina
3Misi laha kipana Jesu Khrist thohkiitna jiaha a khotuahna loupitah dungjui a kinepna hing tang diing a eiuh hung hingkhe kiitpa Pathian leh i Lalpa uh Jesu Khrist Pa chu phat in um hen, 4Goutan sethei lou, huleh tuaithei lou, vaan a nanguh diinga siit mu diingin, 5Hun nunung chianga kilang diing hutdamna mu diing a ginna jala Pathian silbawltheihna a kol na hi uhi. 6Huah chu nasatahin na kipaah va, tuin tomkhat sung a poimoh leh, ze-etna jat tuamtuam in lungkham tadih mahleh u’chin; 7Na ginna etkhiahna u’chu, sana mei a etkhiah ahih nung a zong mangthang jel sanga luul zaw, Jesu Khrist hung kilaahni chianga paahtawina leh, zahbawlna leh, loupina a muh a, a um theihna diingin. 8Mu ngei loupiin amah chu na lungsiat va; tuin amah mu sih zong leh u’chin na gingta va, kipaahna soi guallouh leh loupina a dimin na kipaah uhi; 9Na ginna uh buchinna, na hagau uh hutdamna ngei chu mu in. 10Hu hutdamna thu chu, na kawmva hehpihna hung tung diing thu na soilawh zawlneite’n a kan va, phatuamngaitahin a hawldoh uh; 11Khrist thuaahna leh, a nung a hung jui diing loupina thu ana ma heetsah laiun, Khrist Hagau amah va um in bangchihlai hun ahiai, ahihlouhleh bang tobang hunin ahiai a heetsah chih hawldoh tum in. 12Vaan akipana Hagau Siangthou hung kisawlkhia panpiha na kawmva tanchinpha soitute’n amahuh diing chauh hilou in, eiu diingin tua na kawmva thu kisoisawnte nna a tong uh chih a kawmvah suhlat in a um hi; hu silte chu angelte’n zong etvel a ut uhi.
Khristiante gamtatdan diing
13Huchihjiahin na lungsim kawng uh gaah unla, pilvaang un; huleh Jesu Khrist hung kilaah chianga nanguh hung kipuaahsah diing hehpihna chu a tawpdongin lamen un; 14Ta thumangtahte bangin, na heet louh lai va na nidanglai utnate uh bang a um louin; 15Hizongleh nanguh hung koupa a sianthou bangin nanguh zong na gamtatdan zousiah vah siangthou un: 16Bang jiahin ahiai i chih leh, Nanguh siangthou un; ajiahchu kei ka siangthou hi, chih gelh ahi. 17Huleh deihsahtuam nei lou a mi chin a natoh dungjui a vaihawmsahtu chu Pa chia kouna hih uleh, hitaha na vaithaam lai hun uh laudan siam in zang un: 18Na pulepate vapat tawndan a na muh uh na umdan uh bangmah hilou apat silsethei, dangka leh sana a tat na hi sih va. 19Hizongleh belaamnou demna bei leh niin baang lou sisan banga Khrist sisan luul a tat na hi zaw uhi. 20Amah chu khovel kisiam ma pehin guatlawh in a um ngei a, hizongleh hi hun nunungte ah nanguh diingin suhlat in a umta hi. 21Amah jiahin misi laha kipana amah kaithoupa leh loupina pepa Pathian na gingta uhi; na ginna uleh na kinepna uh Pathian a ahih theihna diingin. 22Unaute tunga lungsiatna daai lou nei diing khopa Hagau jala thutah jui a na hagau uh na suhsiangthou taah jiahun, phatuamngaitahin khat leh khat lungtang siangthou in kilungsiattuah un. 23Chi sethei laha hilou in, chi sethei lou, Pathian thu kumtuang a hing zing leh um zing laha piangthah na hi zaw uhi. 24Ajiahchu mihing zousiah hi hampa bang ahi a, huleh mihing loupina zong hampa paah bang ahi. Hampa chu a vul a, a paah zong a pulh hi. 25Hizongleh Lalpa thu chu kumtuang in a um zing hi. Huleh hi chu na kawmva tanchinpha mang a thu kisoi chu ahi.
Currently Selected:
PETER I 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.