PETER I 3
3
Pasalte leh jite umdan diing
1Huchimahbangin, nanguh jite, na pasalte uh kawm chiatah kituluut un, huchi'n koiaha in thu gingta sih mahleh, thu lou a, jite gamtatdan a zohin a um thei diing hi; 2Laudan siam kawm a na gamtatdan siangthou uh a et chiangun. 3Na kicheina u’chu polam kicheina sampheehte leh sana khi ohte, ahihlouhleh puansilh a kicheite hilou in; 4Lungtang a mihing thuguuh, lungsim thunuaigolh leh nunnem puansilh sethei lou hi heh, huchu Pathian mitmuh in a manpha mahmah hi. 5Ajiahchu hutobangmah in malai a numei siangthou, Pathian gingtate zong, amahuh pasalte thuthu a um in ana kichei uhi; 6Sara ngei in Abraham chu lalpa chia kou a a thu a man bangin: silhoih bawl a, heemlauna mawngmawng lau lou a na um laisiah uh Sara tate na hi uhi. 7Huchimahbangin, nanguh pasalte, na haamteina uh daal a, a umlouhna diingin, hinna hehpihna tangkhawm diing na hih jiahun, numei chu beel keehbaih zaw bang a ngai in, na jite u’chu paahtawi kawmin, heetna dungjuiin amahuh toh umkhawm un.
Khristian kilainatna
8A tawppen in, khat leh khat kilainattuah in, lungsim mun khat pua unla, hehpih siam unla, lungnem un; 9Giitlouhna giitlouhna a thuh louin, taina zong taina a thuh lou in, hizongleh vangpiahna tang diing a kouh na hi uh chih he in vangpiah zaw un. 10Bang jiahin ahiai i chih leh, hinna deih leh, ni hoihte muh ut in gilou apat a lei veeng henla, a muuh zong heemthu soilou diingin veeng hen. 11Gilou tawpsan henla, silhoih bawl hen; kilemna hawl henla, delh jel hen. 12Ajiahchu Lalpa mit chu midihtatte tungah a tu a, huleh a bil zong a haamteina lam vah a kidoh hi; hizongleh Lalpa meel chu silgilou bawlte tungah a um veu hi.
Dihloutah a bawlna thuaahna leh Khrist ettonna
13Huleh silhoih bawltute na hih uleh koi ahiai nanguh poi hung khoih diing? 14Hizongleh dihtatna jiaha na thuaah uleh na hampha uhi; ahung vauna uh lau sih unla, lung zong lungkham sih un. 15Hizongleh na lungtang vah Lalpa Pathian chu hihsiangthou unla; huleh nanguha um kinepna jiah hung dong photmahte thunuaigolh tah leh laudansiam a dawng diingin bangchih laipouhin kipeih zing un. 16Khrist a na gamtatdan hoih uh dihloutah a hung demte, silgilou bawl banga ahung soisiatna va a zum theihna diingun sialepha heetna hoihtah nei un. 17Bang jiahin ahiai i chih leh Pathian lemsah ahih inchu, silgilou bawl jiaha thuaah sangin silhoih bawl jiaha thuaah a hoihzaw hi. 18Ajiahchu Pathian kawma ahung pui theihna diingin Khrist in zong sualnate jiahin khatvei a thuaahta a, midih in midihlou luang in, tahsa in suhlup in a um a, hizongleh Hagau a suhhing in a um hi. 19Hu Hagau in a va chiah a, suangkul a um hagaute kawmah thu a va soi hi; 20Hute’n nidanglai a Noah damlai a kuang bawl sung teng Pathian thuaahzohna in a ngaah laiin a thumang sih va, hu kuang ah mi tawmtakhat, huchu, mi giat tuia hutdam in a um uhi. 21Hu lim etsahna in baptisma in zong tuin (tahsa nitna koihmang hilou in, Pathian lama sialepha heetna hoih suhlungkimna hizaw in) Jesu Khrist thohkiitna in ahung hundam hi. 22Amah chu vaan ah a chiahta a, angelte leh thuneihnate leh silbawltheihnate a thunuai a koih in Pathian jiatlamah a umta hi.
Currently Selected:
PETER I 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.