PETER I 4
4
Sualna tawpsanna
1Huchi'n eiuh diinga Khrist in tahsa a hung thuaahsahta ahihjiahin nanguh zong huchibang lungsim in kithuam un; ajiahchu koipouh tahsa a thuaahsa in chu sual a tawpsanta hi; 2Ahun umna laiteng tahsa a mihing utna lam banga hingta lou a, Pathian deihzawng a a hinzawh na diingin. 3Ajiahchu huuhnate, utnate, uain hainate zumun nopnate, ankuang luinate, huleh milem biahna kihdahhuaite a i umlai a, Jentelte deihzawng bawlna i tumalai hinkhuate uh a hunta hi; 4Hu ah chu amahuh nopbawl luatna banga na bawlve louh uh thumah a sa va, nanguh ahung soise veu uhi. 5Hute’n mihing leh misite vaihawm diing a kipeihsapa kawmah a tanchin uh a soi diing uhi: 6Bang jiahin ahiai i chih leh, tahsa a um mihingte banga vaihawmsaha a um va, hagau a Pathian banga a hin theihna diingun hikhu jiahin a kawmvah tanchinpha soi in a um ahi. 7Hizongleh sil zousiah tawpna diing chu a naita hi; hujiahin lungsim dihtah pua unla, haamtei kawmin pilvaang un. 8Huleh sil bangkim tungah phatuamngaitahin kilungsiattuah chiat un; ajiahchu kilungsiatna in sualna tampi a khuhkhum hi. 9Phunchiah louin khat leh khat kizintuntuah un. 10Mi chinin silpiah na muh bang jelun Pathian hehpihna chi tuamtuam kemtu hoihtahte bangin, hutein na kitohsahtuah chiat un. 11Mi koipouh in thu a soi leh Pathian kam a thupawt bangin soi heh; mi koipouh in thu na a toh leh Pathian in haatna a piah bang jelin tong heh, Jesu Khrist jala Pathian chu sil bangkima paahtawia a um theihna diingin, Amah kawmah kumtuang kumtuang in paahtawina leh lalna umta hen. Amen.
Khrist jiah a thuaahna hamphathuaina
12Deihtahte, nanguh ze-et diinga na tungva ze-etna hung tung chu sil limdang bang aha hung tung bangin ngaihtuah sih un; 13Hizongleh Khrist thuaahnate kikoppih na hih jiahun kipaah un; huchi'n a loupina ahung kilat chiangin nanguh zong naahpitaha nuamin na kipaah thei diing uh. 14Khrist min jiah a tai na hih uleh na hampha uhi; ajiahchu loupina Hagau leh, Pathian Hagau na tungvah a um hi; amahuh lam thu ah amah chu soisiat ahi a, hizongleh nanguh lam thu ah chu paahtawi in a um ahi. 15Hizongleh na lahvah koimah in tualthat bangin aha, guta bangin aha, silgilou bawl bangin aha, ahihlouhleh midangte silbawl soisahmi ahihjiah bangin aha thuaah sih heh. 16Ahihvangin koipouh in Khristian ahihjiaha a thuaah leh zum sih heh; hizongleh hi tungtaang jiahin Pathian paahtawi zaw heh. 17Ajiahchu Pathian innkuante lahah vaihawmna apat hun ahung tungta hi; huleh eiuh apat ahih inchu Pathian tanchinpha gingta loute tawpna chu bang ahita diai? 18Huleh midihtat bawn hutdam ahih haamhaam inchu Pathian ngaihsahloute leh mi sualte khoiah a kilangta diai? 19Huchihjiahin koipouh Pathian lemsah dungjui a thuaahte’n silhoih bawl in a hagau uh Siamtu ginumtah kawma bangin a kawmah kolsah u’hen.
Currently Selected:
PETER I 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.