THESSALONIKATE I 2
2
Paul in a natohna a gupna
1Ajiahchu unaute, na lahva ka luutna uh a thawn ahi sih chih nanguh ngei in na he uhi; 2A thawn hihmalah in, hu ma in, na heetsa mahbangun, Philippi khua a zumhuaitaha bawlgawp a ka um nungun buai pumpum in zong Pathian tanchinpha na kawmva soi diingin ka Pathian vah ka na haangsan zaw mah uhi. 3Ajiahchu, ka thusoi uh zuau a pawt ahi sih a, sianglou a pawt zong ahi sih a, huleh heembawlna in zong ahi sih; 4Tanchinpha kolsah a um diing a Pathian phatsah mi ka hih bang ngeiun mihing kipaahsah diing bang hilou a ka lungtang uh endihtu Pathian kipaahsah hi zaw in, thu ka soi jel uh ahi zaw hi. 5Ajiahchu bangmah chihin zong kimaitangphatna leh duhaamna thu aha ka zang ngei sih uh chih na he uh; Pathian ahung heetpihtu ahi. 6Khrist sawllehte ka hihna un thuneihna zang thei hi zongle ung, mihing tung leh, nanguh tung leh, midangte tungah zong, paahtawina ka hawl ngei sih uh. 7Nuin a tate a duatbawl bangin na lahvah jaidamtahin ka um zaw uhi. 8Huchi'n, ka deihtahte uh na hung hihtaah jiahun nanguh hung ngaina mahmah in Pathian tanchinpha chauh hilou in, keiuh hinna tanpha hung piah ka ut uhi. 9Ajiahchu unaute, ka tohgimdan uleh ka tawldan uh na he zing uhi, na lahva koimah ka suhbuai louhna diingun suun leh jan a tong in Pathian tanchinpha nanguh ka hung hilh uhi. 10Nanguh gingtute laha siangthoutah leh dihtah leh soisel bei a ka gamtatdan uh ahung heetpihtute na hi uh, huleh Pathian zong. 11Pain a tate tunga a bawl bangin, nanguh hung hasot in, hung hamuan in, huleh hung hilhin na tungva ka bawldan uh na he uhi. 12A lalgam leh a loupina a nanguh hung kouluutpa Pathian mi hitaah a na um theihna diingun.
Sawihna
13Hi jiahin Pathian kawmah tawplou in kipaahthu ka soi uhi, ajiahchu Pathian thu kei u’a kipana na jah uh na pom laiun, mihing thu banga pom louin, thutah, nanguh a gingtate a zong nasataha natong thei Pathian thu bangin na pom zaw uhi. 14Ajiahchu, unaute, Judia gam a Pathian kouhtuam pawl Khrist Jesu a umte juitute na hi va; amahun Judate laha a thuaah bangun, nangun zong na gam mite uh lahah na thuaah ve uhi. 15Hu Judate’n chu Lalpa Jesu leh a zawlneite a that va, keiuh zong ahung sawi uh; huleh Pathian a sulungkim sih va, mi zousiah a kalh uhi. 16Hutdam ahihtheihna diing va Jentelte kawma thusoi ahung khap va, a sualna uh suhdim zingna diingin; hizongleh Pathian lungthahna chu a khawh theitawpin a tungvah ahung tungta hi. 17Hizongleh kei u’chu, unaute, tomchakhat sung lungtang lam hilou a, meel lam chauh a kikhen a i um jiahin, kilawptah a na meel uh mu diingin ka hahpan sem uhi. 18Huchih jiahin na kawmva hung ka tum ten va, kei Paul ngei in zong nihvei jen hung ka tumta a; hizongleh Setan in ahung daal veu hi. 19Ajiahchu ka kinepna uh aha, ka kipaahna uh aha, ahihlouhleh ka kipaahna lallukhuh uh bang ahiai? A hung chianga i Lalpa Jesu ma ah nanguh ngei na hi sih diviai mah? 20Nanguh chu ka suan uleh ka kipaahna uh na hi uhi.
Currently Selected:
THESSALONIKATE I 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.