THESSALONIKATE I 3
3
Timothi natohna
1Hujiahin ka thuaah zoh nawn louh phetun Athen khua ah keiuh chauh nuutsiat in um leung hoih ka sa va, 2Huleh i unaupa uh Timothi, Pathian natongtu, Khrist tanchinpha lama ka tohpih uh, nanguh hung sukip diing leh na ginna lam va hung hamuan diingin ka hung sawl uhi. 3Hi gimthuaahnate jiaha koimah a kiliin louhna diingin; ajiahchu hi silte thuaah diing mawng a guat i hi uh chih nanguh ngei in na he uhi. 4Bang jiahin ahiai i chih leh na kawmva ka um laiun sawihna thuaah diing i hi uh chih ka hung hilh khawlta uh; huchibang ngei in a tungta hi, huchu na he uhi. 5Hi jiahin ka thuaah zoh nawn louh phetin, heemtu’n nanguh ahung heempuuhkha diing a, ka tohgimna uh a thawnkha diing chi'n na gindan uh he diingin mi ka hung sawl hi. 6Hizongleh tu a Timothi na kawm vapat ka kawm uh ahung tunin na ginna uleh na lungsiatna uh, huleh kei un nanguh ka hung muh nuam mahmah bangun nangun zong keiuh hung mu nuam mahmah in na hung he zing uh chih tanchin kipaahhuaitah ahung puaah hi. 7Hujiahin, unaute, ka thuaahgimna uleh, ka hahsatna zousiah vah na ginna jiahun na tungvah hamuangtahin ka um uhi. 8Ajiahchu tuin ka hingta uh, Lalpa a na dinkip phot uleh. 9I Pathian uh ma ah na tungva ka kipaahna zousiah uh jiahin nanguh lam thu ah Pathian kawmah bangtobang kipaahthu ka soi thei taphet diviai? 10Na meel uh ka muh theihna diing uleh, na ginna lam va na taahsap uh ka hung suhbuchinsah theihna diingun suun leh jan a nasataha haamtei in. 11Huchi'n Pathian ngei leh i Pa un, huleh Lalpa Jesu Khrist in na kawm lam vah hung pui hen. 12Huleh nanguh lama lungsiatna ka hauh bangun, Lalpa’n nanguh khat leh khat kilungsiattuahna leh, mi zousiah na lungsiatna uh hung supung in, hung hausahta hen. 13Huchi'n i Lalpa Jesu Khrist, a misiangthoute zousiah toh ahung chiangin Pathian, i Pa uh ngei ma ah na lungtangte uh sianthouna lama soisel beiin ahung sukip thei diing hi.
Currently Selected:
THESSALONIKATE I 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.