THESSALONIKATE I 4
4
Gingtute gamtatdan diing leh misiangthou laah thu
1Huchi'n unaute, a tawppen in, na umdan diing uleh, Pathian na kipaahsahdan diing uh, ka kawmva kipan a na laah bangun na hauh semna diingun Lalpa Jesu minin ka hung ngen un, ka hung hasot uhi. 2Ajiahchu Lalpa Jesu jalin bangtobang thu ka hung piah uh na he uhi. 3Bang jiahin ahiai i chih leh Pathian deihzawng, na sianthouna diing u’chu hi ahi, kingaih tawpsan un; 4Mi chinin siangthou leh jahtaha a beel chiat uh kepdan na heet diing uh; 5Pathian he lou Jentelte banga huuhna lama kipe lou in; 6Hulam thu ah chu koima’n a val a gamta in a unau tungah sil gilou bawl sih heh; Lalpa chu hutobang silbawlte zousiah phulatu ahih jiahin, kei un zong ka hung hilh khawl un ka hung hesah zouta uhi. 7Ajiahchu Pathian in sianglou diingin ahung kou sih a, hizongleh siangthou diingin ahung kou zaw hi. 8Hujiahin a musit chu mihing musit ahi sih a, Pathian, a Hagau Siangthou hung pepa musit ahi zaw hi. 9Hizongleh unau kilungsiatdan lam thu ah gelhsah na ngai sih uh; ajiahchu kilungsiattuah chiat diingin nanguh ngei Pathian hilhin na um uhi; 10Makedonia gam pumpia unau um zousiah tungah huchu na bawl ngei uhi; hizongleh unaute, hung khang semsem diingin ka hung hasot uhi. 11Thu ka hung piah bang va kam tawm deuh a um a, na nna chiat uh kitoh a, huleh na khut ngei va nna toh diing tum in; 12Huchi'n polam mite lama kilawmtah a na um theihna diingun leh, bangmah taahsap na neih louhna diingun.
Misiangthou donna diing
13Hizongleh unaute, midang kinepna himhim neiloute banga na lungkham louhna diingun ihmute tungtaang na heet louh uh ka deih sih hi. 14Ajiahchu, Jesu a si a, a thou kiit chih i gintaat leh, Jesu a ihmute zong Pathian in amah toh ahung puikhawm diing hi. 15Hichu Lalpa thu in na kawmvah ka soi uh ahi, eite Lalpa hung pai dong a hing a na um nalaite’n ihmute i makhelh sih diing hi. 16Ajiahchu Lalpa ngei chu kikou aw toh, angel tungnungpen aw toh, huleh Pathian pengkuul ging toh vaan akipat hung kumsuh diing ahi a, huleh Khrist a site a thou masa diing uh; 17Huzohchiangin ei hing a na um nalaite huihkhua ah Lalpa tuaah diingin amahuh toh meipi lahah laahtouh in i um diing a; huchi'n kumtuang in Lalpa kawmah i umta diing hi. 18Huchihjiahin hi thutein kihamuantuah chiat un.
Currently Selected:
THESSALONIKATE I 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.