THESSALONIKATE I 5
5
Lalpa hung na diing leh kiging zing a um a poimohdan
1Hizongleh a hun leh a ni lam thu chu unaute, gelhsah na ngai sih uhi. 2Ajiahchu nanguh mahin Lalpa ni chu jan a guta bangin ahung tung diing hi chih chiantah in na he uhi. 3Muanna leh bitna, chia a soi laitahun numei nauvei bangin thakhat in manthaina a tungvah a tung diing a; a suaahta hial sih diing uhi. 4Hizongleh unaute, nanguh chu hu niin guta bang a ahung phawn diingin mialah na um sih uhi. 5Na bawnun vaah tate leh suun tate na hi uhi; jana mi i hi sih a, mial a mi zong i hi sih hi. 6Hujiahin midangte bangin i ihmu sih diing uh; kigingin i ngaihsah zaw diing uh. 7Ihmute chu jan ah ahi a ihmut uh; huleh zukhamte zong jan ah ahi a kham uh. 8Hizongleh ei suun a mite’n chu ginna leh lungsiatna phaw silh in, hutdamna kinepna chu lukhuh a khuh in i ngaihsah diing uhi. 9Ajiahchu Pathian in lungthahna tuaah diing hilou in, i Lalpa uh Jesu Khrist vang a hutdamna mu diingin ahung guat ahi zaw hi. 10Amah chu i luang in a si a, i hah in zong, i ihmut in zong, amah toh i hinkhawm theihna diingin. 11Hujiahin na na hih veu mah bangun kisuhamuang khawm chiat unla, kisuhaattuah chiat un.
Thuhilhna tuamtuam thu a hilhna leh thutawpna
12Huleh unaute, na lahva tonggimte leh, Lalpa a na houtute uleh, nanguh hung hilhtute he diingin; 13Huleh a natoh jiah va amahuh nasataha lungsiatna a ngaisang diingin ka hung ngen uhi. Kituaah chiatin um un. 14Tuin unaute, ka hung hasot uhi, daan banglou a umte hilh unla, lungkete hamuan unla, haatloute panpih unla, mi zousiah lamah thuaahzoutahin um un. 15Koimah in koi giitlouh zong giitlouh a thuh lou diingin pilvaang un; hizongleh nang u’lah hiin, mi zousiah lamah hitaleh a hoih taphot jui un. 16Kipaah zingzing un. 17Tawplou in haamtei un. 18Sil bangkimah kipaahthu soi zing un; ajiahchu nanguh lam thu ah Khrist Jesu ah hichu Pathian deihzawng ahi. 19Hagau sumit sih un. 20Pathian thu kisoi musit sih un. 21Sil zousiah enchian unla, a hoihlam photmah tudet un. 22Sual a kilang zousiah apat kihemkhia un. 23Huleh hamuan na Pathian ngei in napumun hung susiangthou heh; huleh na hagau uleh, na lungsim uleh, na tahsa uh i Lalpa uh Jesu Khrist hung chiang a soiselbei diingin humbit in um hen. 24Nanguh hung kou pa a ginum a, bawl zong a bawl diing hi. 25Unaute, hung haamteisah un. 26Unaute zousiah tawp siangthou in chibai na buuh un. 27Hi lehkhathot unau siangthoute zousiah kawma simsah diingin Lalpa minin thu ka hung pia hi. 28I Lalpa uh Jesu Khrist hehpihna na kawmvah um hen. Amen.
Currently Selected:
THESSALONIKATE I 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.