KORINTHTE II 10
10
Paul in a sawlleh hihna a taahlatna
1Huleh na lahva thunuaigolhtaha um a, na umlouhna va nanguh lama hahkat, kei Paul in, Khrist jaidamna leh nunnemna in ka hung ngen ahi; 2Hizongleh tahsalama um hia keiuh hung ngaihtuah khenkhatte tunga hahkat diing ahi chia ka ngaihtuah chu, na kawmva ka um chianga huchia ka hahkat louhna diingin ka hung ngen hi. 3Bang jiahin ahiai i chih leh tahsa in um mahleh ung, tahsa dou in ka dou sih uhi; 4(Ajiahchu ka gaaldou na gaalvan u’chu tahsa ahi sih a, kulhpi dettah suhchimna diing a Pathian jala silbawltheitah ahi zaw hi). 5Suangtuahnate leh Pathian heetna doudaal a loupitah a kibawl sil saang chintengte paaikhia in, ngaihtuahna chinteng Khrist thumanna suaah a pui in; 6Huleh na thumanna uh suhbukim ahih chianga, thumanglou zousiah phuba la diing a kipeihsa a um in. 7Nangun sil a polama kilatdan a en na hi viai mah? Mi koipouh in Khrist a hi a amah leh amah a kiheet a ahihleh, hichu ama’n ngaihtuah kiit heh, amah Khrist a ahih bangin, keiuh zong Khrist a ka hi uhi. 8Ajiahchu nanguh suhsiatna diing hilou a, bawlhoihna diing zaw a Pathian hung piah ka thuneihna uh hahtahin suang zong le’ung ka zahta sih diing hi. 9Lehkhathot a nanguh hung suhlau tum banga ka lat louhna diingin. 10Ajiahchu amahun, A lehkhathotte zaw a gih in, a haat a; hizongleh a mun ah a sapum a zawngkhal a, a thusoi zong a hawmthoh huai hi, a chi uhi. 11Huchibang mi'n hikhu ngaihtuah heh, na kawmva ka um louh lai va, lehkha a, thu a ka um bangun, na kawmva ka um chiangun zong silbawl in ka um diing uhi. 12Ajiahchu kei u’chu amah leh amah kiphatte lahah ka kisimtel ngam sih va, amahuh toh teh zong ka kitehkaah ngam sih uhi; hizongleh amahuh chu amah uleh amahuh kitehtuah in, amah uleh amahuh kitehkaah in, lungsim nei louin a um uhi. 13Hizongleh kei u’chu ka tehna hun val un ka uang sih diing uhi, hizongleh Pathian hung hawmsah, nanguh zong huap diing a tehna, hu bang jelin ka uang zaw diing uhi. 14Bang jiahin ahiai i chih leh kei un nanguh hung baanpha lou bangin, ka tehna kal val un ka kizankhe sih uhi; ajiahchu Khrist tanchinpha soi in nanguh kawm tanphain ka hung uhi. 15Ka tehna val uh sil, chih chu, midangte tohsa a ki suang ka hi sih va, hizongleh na ginna uh a khan chiangleh ka huap chiang bang jelun nanguh jiahin naahtah a suhlet in ka um diing uh chih ka kinem zaw uhi; 16Na gam kal lam uh tanpha a tanchinpha soi diingin, huleh ka khut va ka bawlsa silte thu a midang bial sunga ki suang lou diingin. 17Hizongleh a ki suang taphot, Lalpa ah ki suang heh. 18Ajiahchu amah kiphat chu phatin a um sih a, Lalpa’n a phat chu mipha ahi zaw hi.
Currently Selected:
KORINTHTE II 10: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.