KORINTHTE II 11
11
A sawlleh hihna thuneihna
1Ka ngol deuhna ah nangun na hung thuaahtheih uh ka deih hi; huleh na hung thuaahthei ngei uh. 2Bang jiahin ahiai i chih leh Pathian thangsiatna in na tungvah ka thangsia hi; ajiahchu Khrist kawma nungaah siangthou banga ka hung piah theihna diing in, na pasal diing uh khat ka hung hualsah hi. 3Hizongleh guul in a doha a Evi a heem bangin, Khrist a tahna leh siangthouna apat bangchi ahakhat in na lungsim uh suhsiatin a umkha diing ka lauthawng hi. 4Ajiahchu ahung penin ka soi louh uh Jesu dang a soi a, na muh ngei louh uh hagau dang na muh va, ahihlouhleh na pom ngei louh uh tanchinpha dang na pom va ahihleh amah chu na ngaisiam uhi. 5Bang jiahin ahiai i chih leh sawlleh lianpen tahpa sanga nengtakhata zong neuzawin ka kingaihtuah sih hi. 6Himahleh thusoi ah kamsiam sih zongleng heetna lamah chu ka huchi sih hi; hizongleh sil bangkimah na lahvah suhlatin ka um uhi. 7Na kawmva Pathian tanchinpha a thawn a ka soi a, tawisang a na um theihna diing va ka kisuhngiam in sil bawlsual ka hiai mah? 8Nanguh nna ka hung tohsah theihna diingin, amahuh apat loh la in, kouhtuam pawl dangte chu a neih uh ka laahsah hi. 9Huleh na kawmva ka umlai a, ka taahsap in, koimah ka hung subuai sih hi; ajiahchu Makedonia gam apat hung unaute’n ka taahsap awng ahung huhsah uhi; huleh sil bangkimah nanguh subuai lou diingin ka kibawl a, huchi bangin ka kibawl jel diing hi. 10Khrist thutah keimaha a um jiahin, Akaia gam sunga hi ka kisuanna chu koima’n ahung sutawp sih diing hi. 11Bangchih jiahin? nanguh ka hung lungsiat louh jiahin maw? Pathian in a he hi. 12Hizongleh lemtaanna deihte apat lemtaanna ka saattan theihna diingin, ka bawl chu ka bawl jel diing hi; a kisuanna va keiuh banga ahung um theihna diingun. 13Bang jiahin ahiai i chih leh huchibang mite chu Khrist sawllehte a kibawlthuh, natongtu heemhaatte, sawlleh tahloute ahi uhi. 14Huleh hichu a limdang sih; ajiahchu Setan ngei zong vaah sawllehin ana kibawlthuh hi. 15Hujiahin a natongtute zong dihtatna natongtute in kibawl le uh huchu sil loupi ahi sih hi; a tawpna u’chu a natoh bang dungjuiun ahi diing hi.
Paul leh a mah doutute kitehkaahna
16Ka soi kiit ahi, koima’n mingolin hung ngaihtuah sih uheh; ahih louh vanglah leh, keimah neukhat beeh ka kisuan theihna diingin mingol bangin hung pom un. 17Ka thusoi chu Lalpa bangin ka soi sih a, hi kisahtheihna ah ngoltah bangin ka soi zaw hi. 18Mi tampi tahsalama a kisuan jiahun kei zong ka ki suang diing hi. 19Ajiahchu nanguh mipil na hi va, mingolte kipaahtahin na thuaah zou jel uhi. 20Bang jiahin ahiai i chih leh mi’n suaah in hung bawl le uh, hung negam le uh, hung hingmat le uh, amah leh amah kiliansah le uh, na maai vah hung beeng le uh, na thuaah zou jel uhi. 21Haatlou ka hi uh chitobangin, keimah kisit in ka soi ahi. Hizongleh midang ngamna ah chu (mingol bangin ka soi ahi), kei zong ka ngam ahi. 22Hebraimi ahi u'maw? Kei zong ka hi. Israelte ahi u'maw? Kei zong ka hi. Abraham haahte ahi u'maw? Kei zong ka hi. 23Khrist natongtute ahi u'maw? (mingol bangin ka soi ahi, ) kei ka hi sem hi; tohgimna bangah a tamzaw sem in, vuaahna bangah a tuang a val in, suangkul taanna bangah mun semin, sihna bangah tampi vei. 24Judate lahah vuaah na sawmli chinna diing khata sam ngaavei ka tuaah a. 25Thumvei chianga jepin ka um a, khatvei suang a seh in ka um a, thum vei kuang siatna ka tuaah a, jan khat leh suun khat tuithuuh laiah ka um a; 26Khualzinna ah tampivei, tuitung a lauhuai ah, suamhaatte laha lauhuai ah, ka chipihte laha lauhuai ah, Jentelte laha lauhuai ah, khopi sunga lauhuai ah, gamdai a lauhuai ah, tui khang lian a lauhuai ah, unau tahloute laha lauhuai ah; 27Tohgimna leh hahsatna ah, tampivei ihmut louhna ah, gilkialna leh dangtaahna ah, tampivei anngawlna ah, dap thuaahna leh saguah na ah. 28Polama hu silte chih louh zong, kouhtuam pawlte ka ngaihtuahna nichina hung net zing ka tungah a um hi. 29Koi haat louhna ka haat louhpih a um ei? koi puuhna ka tawmpih louh a um ei? 30Ki suang diing ka hih taah a leh ka haat louhna lam silte ka suang diing hi. 31Pathian leh i Lalpa uh Jesu Khrist Pa, kumtuanga paahtawi a um in ka zuau louh a he hi. 32Damaska ah kumpipa Areta nuaia gamoptupa’n kei hung matsah tum in Damaskate khopi a veengsah a; 33Huleh kotta ah bawmin kulhpangah ahung khaikhesuh va, huchi'n a khut apat ka suaahtata hi.
Currently Selected:
KORINTHTE II 11: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.