KORINTHTE II 2
2
1Hizongleh tukal lungkham kawma na kawmva hung kiitta lou diing chih keimah thu in kana tum hi. 2Ajiahchu ke’n nanguh hung sulungkham leng, ka suhlungkhamte mah chih louh koi in ahiai kei hung kipaahsah diing? 3Huleh na kawmvah hi thu mah ahi ka hung gelh, huchilou inchu, ka hung chiangin ka kipaahna diingte lahah lungkhamna ka mu zaw kha diing hi; ka kipaahna chu na bawnva kipaahna hi diingin ka hung gingta ngal a. 4Ajiahchu lunggimna leh lungkhamna nasatah apat, mittui tampi toh ka hung gelh ahi; suhlungkhama na um louh va, na tungva lungsiatna nasatah ka nei hi chih na heet zawhna diingun ka gelh zaw hi.
Silbawlsualpa kisiih laahluut kiitna diing a hilhna
5Hizongleh mi koipouh in lungkhamna a siam leh, kei chauh ahung sulungkham ahi sih a, ka hihtaatluat louhna diingin na bawnun ahung sulungkham chiat phet ahi zaw hi. 6Huchibang mi a diingin chu mi tampiin a piah uh hi gawtna a huntawh hi. 7Huchi'n na ngaihdam diing va, na hamuan zawh diing uh ahi, huchilou inchu, huchibang mi chu a lungkham taahluatna in a valhzoukha diing hi. 8Huchi ahihjiahin amah lama na lungsiatna uh sukip diingin ka hung ngen hi. 9Hikhu jiah mahin zong ka gial ahi, sil zousiah a thu na man uleh na man louh uh ka heetchetna diingin. 10Bangma pouh a mi na ngaihdam u’chu ke’n zong ka ngaidam hi; ajiahchu sil bangpouh ka ngaihdam leh, hi ka ngaihdamna mi chu nanguh jiahin Khrist ah ka ngaidamta hi. 11Huchilou inchu Setan in eiuh ah hun lemtaang a mukha diing; ajiahchu a lungtup i haih sih uhi.
Tanchinpha jiaha thuaahna leh gualzohna
12Huleh Khrist tanchinpha soi diing a Troas khua a ka hungin Lalpa’n kei diingin kot khat ahung honsah a, 13Ka unaupa Tita ka muh louh jiahin kaha a muang thei sih a; huchi'n amahuh kampha a ha in, hu apatin Makedonia gam ah ka chiahta hi. 14Himahleh Khrist a gualzohna hung pe zingtu leh, keiuh zang a mun chin a amah heetna gimnamtui phuangdohtu Pathian kawmah kipaahthu um heh. 15Bang jiahin ahiai i chih leh hutdama umte leh mangthaite ah Pathian a diingin Khrist gimnamtui ka hi uhi. 16Lawi khat kawmah sihna diing a sihna gimnam ka hi va; huleh lawi dang kawmah hinna diing a hinna gimnam ka hi uhi. Huleh hi silte diing a chingzou koi ahiai? 17Bang jiahin ahiai i chih leh mi tampiin Pathian thu mite heem a sumkawlveina a, a zat bangun kei un chu ka zang sih uh; hizongleh chihtahzetin Pathian a bang zawin, Khrist ah Pathian mitmuh ah thu ka soi uh ahi.
Currently Selected:
KORINTHTE II 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.