KORINTHTE II 3
3
Gingtute lehkhathot toh tehkaahna
1Kei uleh keiuh kisoiphapan kiit ka hita viaimah? Ahihlouhleh, kei un midangte bangin, na kawmvah, ahihlouhleh, nanguh apat, soiphatna lehkha poimoh, ka hi viaimah? 2Nang u’chu ka lehkhathot uh, ka lungtang va gelh, mi zousiah heet leh sim na hi uhi. 3Khrist lehkhathot, keiuh gelh, lehkhatui a gelh hilou a, Pathian hing Hagau a gelh; suang peeh a gelh hilou a, tahsa lungtang peeh a gelh na hi zaw uh chih chiantah a suhlat na hi uhi. 4Huleh huchibang muanna Khrist jalin Pathian lamah ka nei uhi; 5Bang sil ahakhat keiuh apat ahi chi diingin keiuh chauhin ka chin sih va; ka chinna u’chu Pathian a kuan ahi zaw hi.
Tanchinpha natohna leh daan natohna kikhiahna
6Ama’n chu keiuh thuhun thah natong thei diingin ahung bawl a; lehkhajem a hilou in, Hagau a natong diingin ahi zaw; ajiahchu lehkhajem in a sulum veu a, Hagau in chu hinna a pia hi. 7Hizongleh suhbei a um diing loupina a suhloupi a a um jiaha Israel tate’n Mosi maaitang entang thei lou khopa sihna natohna, suangpeeha sut a gelh bawn a loupi inchu; 8Hagau natohna chu bangchi'n a loupizaw lou thei diai? 9Ajiahchu siamlouh tansahna natohna bawn a loupi inchu, dihtatna natohna chu nasatahin a loupizaw diing hi. 10Bang jiahin ahiai i chih leh loupina umsa chu loupina na sazaw in a khumkhel jiahin hilam thu ah chu loupina a nei nawn sih hi. 11Ajiahchu suhmanga um bawn a loupi a ahihleh, a um zing khu chu nasatahin a loupizaw sem ahi. 12Hutobang kinepna ka neih ziahun, haangtah a thusoi ngamna ka nei uhi. 13Huleh a kiam hiaihiai chu a tawptana Israel tate’n a et tang theihlouhna diing va a maaitang puan a khuh Mosi bang chu ka hi sih hi. 14Hizongleh a lungsim uh suhmial in a um a; ajiahchu tuni tanin thuhun lui a sim chiangun hu maaikhuhna chu hawhkhiah louhin a um zing a; hu maaikhuhna chu Khrist ah suhbei in a umta hi. 15Hizongleh tuni tanphain, Mosi lehkhabu a sim chiangun, a lungtang vah maaikhuhna chu a um zing hi. 16Ahihvangin Lalpa lama a kihei phaatphaat chiangun hu maaikhuhna chu laahmang ahita diing hi. 17Huleh Lalpa chu hu Hagau ahi a; Lalpa Hagau umna photah zalenna a um hi. 18Hizongleh ei uchu i bawnun, maai khuhlouh in, limlanga muh banga Lalpa loupina chu en zingin, huto kibang ngei a um diingin Lalpa Hagau in loupina apat loupina ah ahung sulimdang zing hi.
Currently Selected:
KORINTHTE II 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.