KORINTHTE II 5
5
Lalpa suaahte diing a sihna lauhuai ahih louhdan
1Bang jiahin ahiai i chih leh hi puanbuuh i lei inn uh suhsiat in um mah zongleh, khut a bawl hilou, Pathian khut a kuan kumtuang inn det vaan ah i nei uh chih i he uhi. 2Ajiahchu vaan akipan a i inn diing uh silhthuaahsaha um ut mahmah in hi sungah i thuum zing uhi. 3Huchibang a silhthuaahsaha i um inchu saguah in i um sih diing uhi. 4Ajiahchu eiuh hi puanbuuha umte chu puaahgih pua in i thuum zing uh; silhlou a i umna diingun hilou in, si thei chu hinna valhzoha a um theihna diing a silhthuaahsaha i um ut jiahin ahi zaw hi. 5Huleh hukhu diing a eiuh hung siamtu chu Pathian ahi a, khaamna Hagau hung petu zong ahi. 6Hujiahin sapum inn a i um laisiah uh, Lalpa kawma um lou i hi uh chih he in, bangchih laipouhin muangtahin i um uhi. 7(Ajiahchu muhtheiha pailou in, ginna in i paizaw uhi). 8Muangtahin i um uh, ka chi ahi, sapum a um lou a, Lalpa kawma um i utzaw uhi. 9Huchihjiahin um in um lou zong lehang amah kipaahpih zawng i hihtheihna diingun i tonggim uhi. 10Bang jiahin ahiai i chih leh mi chinin a sapum a a silbawlte asia apha, a bawl bang banga a muhtheihna diingin Khrist vaihawmna touphah ma-ah i bawnun suhlat in i um diing uhi.
Khrist lungsiatna leh siltup
11Hujiahin Lalpa lauhuaidan he in mite ka zawl teitei uhi; hizongleh Pathian kawmah suhlat in ka um va; huleh na sialepha heetna va suhlat a ka um uh zong ka kinem hi. 12Ajiahchu na kawmvah ka hung kisoipha kiit uh ahi sih a; lungsung lama hilou a, a polaang a ki suang te na dawnna diing uh bang aha na neih theihna diingun, keiuh lama kisuan theihna hung bawlsah in ka soi zaw uhi. 13Bang jiahin ahiai i chih leh ka ngol uleh Pathian a diing in ahi a; ka pil uleh nanguh diingin ahi. 14Khrist lungsiatna in ahung sawl teitei hi; ajiahchu hichi'n ka ngaihtuah uhi, mi zousiah sih luang a mi khat a sih inchu, mi zousiah si ahita hi. 15Huleh a hingte zong amahuh diinga a hin nawn taahlouh va, a sih luang va si a, huleh thou kiitpa a diinga a hin zawhna diingun, amah chu mi zousiah diingin a si ahi. 16Huchihjiahin tukalsiah chu tahsalamah koimah ka he nawn sih uhi; ahi, tahsadan in Khrist na he zong le’ung, tuin chu ka he nawn sih uhi. 17Hujiahin mi koipouh Khrist a, a um inchu, silsiamthah ahita hi; sil luite a beita a; ngai un, sil zousiah ahung thah vehta hi. 18Huleh sil zousiah chu Pathian a kuan ahi a, ama’n Jesu Khrist in amah toh kilem in ahung bawl a, huleh ka kawmvah kilepna natohna ahung pia hi. 19Huchi'n Pathian chu Khrist a um in, khovel amah toh kilem in a bawl a, a tatsualnate uh tatsualna a sehsah louin; ka kawmvah kilepna thu ahung kolsahta hi. 20Hujiahin kei u’chu Khrist palaite ka hi va, Pathian in keiuh manga nanguh hung ngen bangin, Pathian toh kilem un chi'n, Khrist luang in ka hung ngen uhi. 21Ajiahchu amah a Pathian dihtatna i hung hihtheihna diingin, sualna mawngmawng he lou amah chu Pathian in eiuh jiahin sual in a bawlta hi.
Currently Selected:
KORINTHTE II 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.