KORINTHTE II 6
6
Pathian hehpihna phattuampih diing a ngetna
1Huleh keiuh amah toh tongkhawmte hi in, Pathian hehpihna chu phattuamna bei a na muh louhna diingun ka hung ngen uhi. 2(Ajiahchu ama’n, Hun kipaahhuai ah ka hung ngaikhia a, hutdamna ni ah ka hung panpih hi, a chi hi; ngai un, tu hun kipaahhuai ahi a; ngai un, tu hutdamna ni ahi). 3Ka thunatohna uh dem a a um louhna diingin sil bangmah ah puuhna diing ka bawl sih uhi; 4Himahleh Pathian thunatongtute ka hi uh chih sil zousiah ah ka suchian va, kuhkalna mahmah ah bang, hahsatna ah bang, taahsapna ah bang, lungkhamna ah bang; 5Jepna ah bang, suangkul taanna ah bang, buaina ah bang, tohgimna ah bang, ihmut louhna ah bang, an ngawlna ah bang; 6Sianthouna in, heetna in, thuaahtheihna in, chitna in, Hagau Siangthou in, lungsiatna dihtahin, 7Thutah thu in, Pathian silbawltheihna in, jiatlevei a dihtatna gaalvan in, 8Zahbawlna leh zahbawl louhna in, soisiatna leh soiphatna in; mi heemtute bangin, midihtah hi ngal in; 9Heetphaah louh bangin, minthangtah hi ngal in; si diing bangin, ngai un, ka hing uhi; vuaahthop bangin, thah chu hilouin; 10Lungkhamtah bangin, kipaah zing ngal in; genthei bangin, mi tampi hausah ngal in; bangmah nei lou bangin, sil zousiah nei ngal in.
Kikoihtuam diing leh kisusiangthou diing a ngetna
11Aw nanguh Korinthte, na kawmvah ka kam uh ka kaah va, ka lungtang uh ka hong lian uhi. 12Keiuh nehgawpa um na hi sih va, na lungsim va nanguh kinehgawp na hi uhi. 13Huleh ka hung piah bang na hung piah theihna diingun (tate kawma soi bangin ka soi ahi), nanguh zong kihong lian un. 14Ginglou mite toh kituaah louin ngawngkol pokhawm in um sih un: ajiahchu dihtatna leh dihtat louhna in bang kikopna a nei ei? huleh vaah leh mial in bang kithuahna a nei viai? 15Huleh Khrist leh Belial in bang kituaahna a nei viai? ahihlouhleh gingtu leh ginglou mi’n bang tankhawm a nei viai? 16Huleh Pathian biahinn leh milemte’n bang kizopna a nei viai? Ajiahchu nang u’chu Pathian hing biahinn na hi uhi; Pathian in, Amah u’ah ka teeng diing a, amahuh ah ka vaahleh diing a; huleh a Pathian uh ka hi diing a, amah u’zong ka mite ahi diing uh, a chih bangin. 17Hujiahin a lahva kipan hung pawtdoh unla, a tuam in um un, Lalpa’n a chi, huleh sil sianglou khoih sih un; huchi'n ka hung pom thei diing a. 18Huleh nanguh diingin na Pa uh ka hi diing a, nanguh chu ka tapate ka tanute na hi diing uh, Lalpa silbangkim bawlthei in a chi hi.
Currently Selected:
KORINTHTE II 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.