KORINTHTE II 7
7
1Hujiahin unau deihtahte, hi thuchiamte i neih jiahun, Pathian launa a sianthouna subukim in, tahsa leh hagau bolhhohna zousiah apat i kisusiang diing uhi.
Tita hungna jala lungnop louhna leh hasotna
2Ka lam u’ah na lungsim uh hong un; koimah a lam louin ka bawl sih uh, koimah ka suse sih uh, koimah ka heembawl sih uhi. 3Nanguh siamlouhtansahna diing a hi thu ka soi ahi sih; i sih leh sikhawma, i hin leh hingkhawm diingin ka lungtang vah na teeng uh chih, tuma in ka soita hi. 4Nanguh lamah ka haam ngamdan a loupi a, nanguh a ka kisuanna a loupi ahi; lungmuanna in ka dim a, ka gimthuaahna zousiah vah nasatahin ka kipaah ahi. 5Ajiahchu Makedonia gam ka hung tun un, ka tahsa un khawldamna a nei sih a, lehlam lehlam a suhbuai in ka um zaw uhi; polamah kisualnate a um a, sunglamah launate a um hi. 6Hizongleh paampaih a umte hamuantu Pathian in Tita hungna in ahung hamuanta hi. 7Huleh amah hungna chauh hilou in, ama’n nanguh a hamuanna a neihdan, nangun kei na hung ngaihdan uh, na hung hasiatpihdan uh, kei diinga na phatuamngaih dan uh ahung hilh phetin ahung hamuangsahta a; huchi'n ka kipaah semta hi. 8Ajiahchu keima’n ka lehkhathot in hung sulungkham zongleng, ka kisiih sih hi, na kisiihta himah leng; ajiahchu hu lehkhathot mahin nanguh, tomtakhat sung chauh hizongleh, ahung sulungkham chih ka he hi. 9Tuin chu ka kipaah ahi, suhlungkham a na um jiah uh hilou in, kisiihna diing a na lungkham jiahun ahi zaw; ajiahchu nangun keiuh jiaha siatna bangmah na tan louh na diing va Pathian deihlam banga suhlungkham a um na hi uhi. 10Ajiahchu Pathian deihlam banga lungkhamna in hutdam a umna diingin kisiihna tun lou kisiihna a bawl zaw hi; hizongleh khovel lungkhamna in chu sihna a bawl veu hi. 11Bang jiahin ahiai i chih leh ngai un, Pathian deihlam banga hi na lungkhamna uh ngei in bangchituha nanguh a pil va ana bawldoh a taimah; ahi, nanguh kisuhsiangnate, ahi, lungthahnate, ahi, launate, ahi, lunggulhnate, ahi, phatuamngaihnate, ahi, phubalahnate! hi silte zousiah ah na siang uh chih na muchiansahta uhi. 12Huchi'n na kawmvah gial zongleng, a dihlou bawlpa jiaha gelh ahi sih a, dihloutah a thuaahpa jiaha ka gelh zong ahi sih a, ka tungva na phatuamngaihdan uh Pathian mitmuha na kawmva suhlat a, a um theihna diing a ka gelh ahi zaw hi. 13Hujiahin na hamuanna vah ka hamuangta uhi; ahi, Tita kipaahna jiahin ka kipaah tungtuang uhi, na bawnva a lungsim na tohhalhsah jiahun. 14Ajiahchu a kawmah nanguh bang aha a hung suanna neita leng ka zum sil hi; hizongleh thutah a sil zousiah na kawmva ka soi bangun, Tita ma a ka hung suanna zong thutah ahi mawng hi. 15Huleh nanguh na bawnva na thumandante uh, lau leh kithing pum a amah na kipaahpihdante uh a geeldoh chiangin, a lungsunga nanguh ahung lungsiatna a zual deuhdeuh hi. 16Hujiahin sil zousiah a na tungva muanna ka neih jiahin ka kipaah hi.
Currently Selected:
KORINTHTE II 7: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.