PETER II 1
1
Chibaibuuhna
1Simon Peter, Jesu Khrist suaah leh sawlleh in, Pathian leh i Hundampa Jesu Khrist dihtatna jala ginna manpha i tan bang tangte kawmah: 2Pathian leh i Lalpa Jesu heetna jiahin, na tungvah hehpihna leh hamuanna suhpung in um hen;
Khristian hamphatna leh umdan
3Amah loupina leh hoihna a ei hung koupa heetna jiahin a Pathian silbawltheihna bangin hinna leh Pathian ngaihsahna lam thu ah sil zousiah ahung pia hi. 4Hujiahin thuchiam manpha leh loupi mahmah chu ahung pia hi: huchi'n utna jiaha khovela siatna um chu taikhiahsan in Pathian hinna kikoppihte na hung hi thei diing uhi. 5Hujiahmahin, thanop suah himhim in, na ginna vah hoihna hal unla; na hoihna vah heetna hal unla; 6Na heetna vah kideehtheihna hal unla; na kideehtheihna vah kuhkalna hal unla; huleh na kukalna vah Pathian ngaihsahna hal unla; 7Na Pathian ngaihsahna vah unaute kideihsahna hal unla; huleh na unaute kideihsahna vah lungsiatna hal un. 8Ajiahchu hite nanguh a, a um a, a khan jel leh, i Lalpa Jesu Khrist heetna lamah chiing leh gahlou a um louin ahung bawl diing uhi. 9Hizongleh hi silte nei lou chu mittaw ahi a, gamlapi a mu thei sih a, huleh a nidanglai sualte apata silsiang a a umna zong a mangngilhta hi. 10Hujiahin unaute, nanguh hung kikouhna leh teelna suchian diingin thanop hung suah un: ajiahchu hite na bawl uleh chu na puuh ngei himhim sih diing uhi: 11Ajiahchu, huchi'n Jesu Khrist i Lalpa uleh Hundampa kumtuang gam a luutna nanguh kawmah ahung musah na sa mahmah diing hi.
Peter sih kuanlam
12Hujiahin hi silte he in, thutah na kawmva um a na kipna vah hu silte chu hung heetpih gige diingin, ngaihsah louin ka um himhim sih diing hi. 13Ahi, hi bawhinn a ka um sung teng nanguh hung heetpih in hung tohhalh zing hoih ka sa hi; 14I Lalpa Jesu Khrist hung heetsah mahbangin, hi ka bawhinn koihmangna ahung tungpah diing chih ka he ngal a. 15Ahi, ka paikhiah nung chiang a hi silte na heetzingna diingun ka hahkat diing hi.
Peter heetpihna leh zawlneite heetpihna
16Ajiahchu i Lalpa Jesu Khrist silbawltheihna leh ahung paikiitna thu ka hung heetsah laiun, taangthu piltaha ngaihtuah khiah juite ka hi sih va, a loupina mute ka hi zaw uhi. 17Ajiahchu ama’n chu Pa, Pathian kawma kipatin paahtawina leh loupina a mu a, huchihlaiin loupina nasatah apatin hichibang aw a kawmah ahung tung a, Hichu ka Tapa deihtah, ka kipaahna mahmah ahi, chi'n. 18Huleh taang siangthou a, a kawma ka um laiun, hi aw chu vaan akipata hung pawt keiuh ngei in ka ja uhi. 19Soilawhna thu kip zaw sem zong i nei uhi: khua ahung vaah a, na lungtang va jingsol aahsi ahung suaah masiah mun mial a vaah um a ngaihsah bang va na hih uleh na bawl hoih uh ahi diing hi. 20Pathian lehkhathu a thusoilawh himhim koima’n a tum a a letdoh diing ahi sih chih he masa un. 21Ajiahchu thusoilawh himhim nidanglaiin mihing deihdan a pawt ahi sih a, Pathian misiangthoute’n Hagau Siangthou phuut ahih bang jelun ana soi uh ahi zaw hi.
Currently Selected:
PETER II 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.