JOHN III 1
1
1Upa deih mahmah Gaia, thutah a ka lungsiat kawmah. 2Deihtah, sildang zousiah sangin, na hagau khantouh jel banga na khantouh diing leh damtaha na um diing deihin ka ngen hi, 3Ajiahchu unaute a hung a, thutah a na umdan banga nangmaha thutah um ahung heetsah tahun ka kipaah mahmah hi. 4Ka tate thutahah a um uh chih ka jah sanga kipaahna lianzaw ka nei sih hi. 5Deihtah, unaute tung leh mikhualte tunga na bawl photmah ginumtahin na bawl veu hi. 6Hute’n chu na lungsiatna kouhtuam ma ah a phuangta uhi; a khualzinna va Pathianmi bangtah a na makaih jel leh na bawl hoih diing hi. 7A min jiaha Jentelte kawma bangmah la lou a chiahdoh ahihjiahun. 8Hujiahin thutah a kipanpihtuahte i hihtheihna diingin hutobang mi chu i ngaih diing ahi. 9Kouhtuam kawmah ka gial a; hizongleh a lahva tungtuan utpa Diotrephi in keiuh ahung ngai sih hi. 10Huchihjiahin, ka hung lechu, a silbawlte ka hedohsah diing hi; ka tungva thu gilou soi a, a kamtam dan, huleh huzong hun sa louin, amah ngei in unaute a hua a, huleh a deih, nuamte zong a khap a, kouhtuam apat a nohdoh hi. 11Deihtah, sil gilou jui sinla, sil hoih jui zaw in. Sil hoih bawlmi chu Pathian a kuan ahi; ahihvangin sil gilou bawlmi’n chu Pathian a mu sih hi. 12Demetria in mi zousiah apat leh, thutah apat ngei in pahtaat a loh hi; ahi, kei un zong ka heetpih uhi, huleh ka heetpihna u’chu a dih ahi chih na he uhi. 13Gelh diing tampi ka nei a, hizongleh lehkhapuan leh lehkhatui in na kawmah ka gial sih diing hi; 14Himahleh sawtlou kalin ka hung mu diing a, kimaaituah in thu i soi diing chih ka kinem hi. 15Hamuanna na tungah um hen. I lawmte'n chibai ahung buuh uhi. I lawmte minloh chiatin chibai hung na buuhsah in.
Currently Selected:
JOHN III 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.