SILBAWLTE 18
18
Paul Korinth khua ah
1Hu silte zohin Paul chu Athen khua apat a pawta, Korinth khua ah a chiahta hi. 2Huleh, a min Akuila, Judami khat a mu a, hu mi chu Ponta gam a piang ahi a, Klaudia in Judate zousiah Rome khua apat pawt thu a piah jiaha a ji Prisilla toh Italy gam akipat hung tung panphet ahi va; huleh, Paul chu a kawmvah a hung a. 3Huleh, a natoh uh kibang ahih jiahin a kawmvah a tunga, a tongkhawmta va, a natoh uh chu puaninn bawl ahihjiahin. 4Huleh khawlni chinin kikhopna inn ah thu a suutpih a, Judate leh Grikte chu gingta diingin a zawl veu hi. 5Huleh Silas leh Timothi Makedonia a kipat ahung tun un, Paul chu thusoi chauhin a umta a, Jesu chu Khrist ahi chih Judate kawmah a hilhchian veu hi. 6Huleh a kalh un a soisia va, Paul in a puan a thing a, a kawmvah, Na moh uh na tungvah kituh heh; kei chu ka siang ahi; tu kalsiah Jentelte kawmah ka chiahta diing hi, a chi a. 7Huleh hu apatin a chiah a, mi khat a min Tita Justa a chih uh inn ah a luut a, hu mi'n chu Pathian a bia veu a, a inn zong kikhopna inn toh kizom ahi. 8Huleh Krispa, kikhopna inn houtu in a innkuante zousiah toh Lalpa a gingta va; Korinth khua a mi tamtahin zong jain a gingta va, baptisma a tangta uhi. 9Huin janin Lalpa’n Paul kawmah manglam bangin, Lau sinla, sip louin thu soi jel in; 10Kei na kawmah ka um zing ahi, huleh, suna diingin kuama’n na tungah khut a ha sih diing uhi; hi khua ah mi tampi ka nei ngal a, a chi hi. 11Huleh Paul chu huah a lahva Pathian thu hilh in kumkhat leh ha guup a umta hi.
Ngaihsampa Gallio leh Paul
12Huleh Gallio, Akaia gamoptu ahih laiin, Judate in kithutuah in Paul a sual va, vaihawmna touphah ma ah a tut va. 13Hipa soplaiin, daan kalh zawngin Pathian be diingin mi a heempuuh hi, a chi va. 14Huleh Paul in dawng diing a, a kisah laitahin, Gallio in Judate kawmah, Aw nanguh, Judate, hi haw hi sil dihlou thu aha, sil hihsual thu aha beeh hileh, matheilouin ka hung ngaihsah diing a; 15Hizongleh thute, minte, nanguh daan thute giap ahihleh vang nangun kingaihtuah zaw un; ajiahchu ke'n zaw huchibang thu ka ngaihtuah ut sih hi, a chi a. 16Huleh vaihawmna touphah apatin amah uh a delhmangta a. 17Huin Grik mi zousiah in kikhopna inn houtu Sostheni a man va; vaihawmna touphah ma ah a vua va. Huleh, Gallio in hu a silbawlte uh poi a sa sih hi.
Paul Syria ah a kiih kiit
18Huleh hunungin Paul chu ni sawttah a taam nalai a, huzohin unaute chu kampha in a khen a, hu akipatin Syria gam lamah kuang in a chiahta a, Prisilla leh Akuila toh zong a ton uhi; kichiamna a neih jiahin, Kenkria khua ah Paul in a lu a meet hi. 19Huin Ephesa khua a tunga, amahuh hu ah a nuseta a; hizongleh, amah chu kikhopna inn ah a luut a, Judate toh thu a suutkhawmta uhi. 20Huleh amahun a kawmva sawtdeuh taam diingin a hou va, amah a ut sih hi. 21Hizongleh kampha in a khen a, Jerusalem a ankuang luina um diing ah tel ngei ka tum hi; Pathian in a phal leh na kawmvah ka hung kiit diing hi, chi in. Huleh, Ephesa khua akipatin kuang in a chiahta hi. 22Huleh Caesarea khua ah ahung kai a, a chiahtou a, kouhtuamte chibai a buuh a; Antiok khua ah a chiahsuhta hi. 23Huleh huah sawttah a um nungin, a chiah kiit a, nungjuite zousiah sukip diingin Galatia gam leh Phrigia gam zousiah a tuansuaah hi.
Apollo Ephesa khua ah
24Huleh Judami khat a min Apollo, Alexandria khua a piang, mipiltah Pathian lehkhathu he deuh mai, Ephesa khua ah a chiah a. 25Hu mi chu Lalpa lampi thu jil sa ahi a; Hagaua guntuhtahin Lalpa tanchin pilvaangtah a soi in a hilh jel a, John Baptisma thu chauh a he giap a. 26Huleh kikhopna inn ah haangsantahin thu a soipanta a; Prisilla leh Akuila in a thusoi a jah un a inn vah a pui va, a kawmah Pathian lampi thu kichian semin a hilhchianta uhi. 27Huleh ama’n Akaia gam a chiah peh a tup phetin, unaute’n a hasot va, amah ana kipaahpihna diingun nungjuite kawmah lehkha a thotta uhi; amah a tun in, Pathian khotuahna jala gingtate nasatahin a panpih hi; 28Ajiahchu ama’n vantaang heetin Judate a nialdong a, Pathian lehkhathu zangin Jesu chu Khrist ahi, chih a hesah hi.
Currently Selected:
SILBAWLTE 18: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
