SILBAWLTE 19
19
Baptistu John nungjuite Ephesa khua ah
1Huleh hichi ahung hi a, Apollo Korinth khua a, a um kalin Paul chu khosah lam tuansuah zouin Ephesa khua ahung tung a; huleh nungjui kuate aha a mu a, 2Ama’n a kawmvah, Na gintaat tuung laiun Hagau Siangthou na tang viai? a chi a. Amahun a kawmah, Hagau Siangthou a um chih zong ka jakha ngei mawngmawng sih uh, a chi va. 3Huin ama’n a kawmvah, Bang baptisma ah ahiai na tan uh? a chi a. Amahun, John baptisma ah, a chi uh. 4Huleh Paul in, John inchu mi kawmah a nunga hung diing Khrist Jesu chu na gintaat diing uh ahi, chi'n, kisiihna baptisma in a baptis veu ahi, a chi hi. 5Amahun hi thu a jah tahun, Lalpa Jesu min in baptisma a tangta uhi. 6Huleh Paul in a tungvah a khut a ngah tahin, Hagau Siangthou a tungvah ahung tungta a; huleh, haam heetlouh in a haam va, thu a soita uhi. 7Huleh a bawnun mi sawm leh nih(vel) ahi uhi.
Paul Ephesa khua ah
8Huleh Paul chu kikhopna inn ah a luut a, ha thum sung diing haangsantahin thu a soi a, Pathian gam lam thu ah kinialpih in mi a zawlluut jel hi. 9Hizongleh khenkhat a chihmoh va, a gingta ut sih va, mipi ma a hu lampi chu a soisiat tahun, amahuh a chiahsan a, nungjuite a puituam a, Tiranna skul ah nichinin a kihoulimpihta hi. 10Huleh hichibangin kum nih sung a um a; huchi'n Asia gam a um zousiah Judate leh Grikte in zong Lalpa Jesu thu a zata uhi. 11Huleh Pathian in Paul khut in silmah limdang tahtahte a bawlsah a; 12Huchi'n a sa tung akipatin kisiaahna puante aha teenthuaahte aha bang damloute kawmah ahung tawi va, a natnate uh a dam jel a, huleh, a sung va kipat dawite zong a pawt jel uhi. 13Huin Juda vaah vai, dawithu he kuate aha in, Paul in a thu a tangkoupih veu Jesu minin ka hung vau uhi, chi'n, dawipaaite tungah Lalpa Jesu min a lou veu vial va. 14Huleh Judami, siampu lal khat, Skeva in hutobang bawl tapa sagih a nei hi. 15Hizongleh dawi in chu a dawng a, Jesu ka he hi, Paul zong ka he hi; hizongleh, nanguh kuate na hi viai? a chi a. 16Huin dawipaiin chu amahuh ahung boh a, a zou a, a nuaisiahta a, huchi'n hu inn apatin saguah leh liam in a taidohta uhi. 17Huleh hi chu Ephesa khua a teeng zousiah, Judate leh Grikte kawmah zong a thangta a; huleh, a bawnun a lau va, Lalpa Jesu min a lianta hi. 18Huleh a gingtate zong tamtah a hung va, a silbawlte uh thupha a tawi va, a kiphuangta uhi. 19Mitphialdawi zang mi tampiin zong a lehkhabu uh ahung tawikhawm va, mi zousiah mitmuh in a haalta uh; huleh, a man a suut va, dangka saang sawmngaa a phasah uhi. 20Huchi'n loupitah mai in Lalpa thu chu a dalh a, a gualzou jel hi.
Paul siltup
21Hu silte nungin, Paul in a lungsim in, Makedonia gam leh Akaia gam a totsuaah zoh chianga Jerusalem khua a chiah a tum a, Hutah a ka chiah zoh chiangin, Rome khua zong, ka va pha teitei diing, a chi a. 22Huchi'n, amah natohsahte mi nih Timothi leh Erasta chu Makedonia gam ah a sawl a; hizongleh, amah chu Asia gam ah hun tomkhat a um tadih hi.
Ephesa khua a buaina
23Huleh hulai velin hu Lampi thu jiahin mi a buai nasatenta hi. 24Ajiahchu mi khat a min Demetria, dangka siih kheengtu, dangka siih a Diana lim bawltu in khutsiamte kawmah kilohna tampi a pe jel veu hi. 25Hu mi in amahuh a koukhawm a, a natoh banguh tongte toh; huin, a kawmvah, Pute, hi natohna hi i hauhna uh ahi, chih na he uhi. 26Hi Ephesa khua chauh ah hilouin, Asia gam pumpi ah zong, hi Paul in, khuta bawlte chu Pathian ahi sih uh, chi'n mi tampi a thuzoh a, a kiheisah zouta hi chih, nanguh ngei in na mu un na ja uhi; 27Huchi'n i kiveina uh man louh ahung suah diing lauhuai chauh zong ahi sih; pathiannu loupi Diana biahinn zong ahung kingai neu diing a, huleh Asia gam pumpi leh khovela mi’n a biah uh amahnu ngei zong a loupina suhsiatin ahung umkha diing chih a lauhuai ahi, a chi a. 28Huleh hu thute a jah tahun a lungthah mahmah va, Ephesa mite Diana a loupi hi, chi'n a kikou uhi. 29Huin a kho-pum in a buai vehta va; Gaia leh Aristarkha, Makedonia gam a mi, Paul in a khualzinna a, a tonpihte geel chu a man va, kituaahtahin etnop inn ah a tailuutpihta uhi. 30Huin Paul in mi laha luut a tup leh a nungjuite’n a phal sih va. 31Huleh Asia gam a houtu pente laha Paul lawmte khenkhat in a kawmah mi a sawl va, etnop inn a luut hetlou diingin a houhou uhi. 32Khenkhat thu khat in a kikou va, khenkhat thudang in a kikou va; kikhawmte chu a buai va; mi tamzaw in a kikhop nasan uh zong a he sih uhi. 33Huleh mipi lah apat Alexander a kaidoh va, Judate’n amah chu malam ah a sawn va. Huleh, Alexander in a khut in a jap a, mi zousiah kawmah a siamna thu soi a tum hi. 34Hizongleh amah Judami ahi chih a heet tahun, daahkal nih sung diing vel aw kituaahtahin, Ephesa mite Diana a loupi hi, chi'n a kikou kou uhi. 35Huleh khosung lehkhagialtuin mipi a daihsah zohin, Nanguh Ephesa khua a mite, Ephesite hi pathiannu Diana loupi leh, Jupiter apat hung kia milim bia ahi uh, chih he lou kua a um ei? 36Huchi'n hi thu nial gual ahih louh nungin, na sip khiinkhian diing uh ahi, kin hehuin bangmah na bawl diing uh ahi sih hi. 37Ajiahchu, hi na hung mi puite uh hi biahinn luhmi lah ahi sih va, i pathiannu soisete zong ahi sih uh. 38Demetria leh a tohpih khutsiam haw in mi kua tung aha a thubuai a neih uleh, thubuai soina inn honsa in a um hi, huleh gamoptute zong a um uhi; kiheeh u’heh. 39Hizongleh sil danga buaina nei na hih uleh daan banga kikhopna ah lep diing ahi. 40Tunia buaina jiahin i tungvah thu ahung um diing a lauhuai hi, i kikhopna san pen hi ahi chih diing laha um ngal sih a, a chi a. 41Huleh ama’n huchia a soi zohin kikhawmte chu a tawpsahta hi.
Currently Selected:
SILBAWLTE 19: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
