EPHESITE 3
3
A khang a khang a thuguuh kiphual, kouhtuam
1Hikhu jiahin kei Paul, nanguh Jentelte diing a Jesu Khrist suangkul taang in, 2Nang u’diing a Pathian hehpihna kepna nna piah ka hih na jata ngei diing va; 3Huchia kilaahna a thuguuh kiphual ka kawma ahung heetsah, (tuma a tomtakhat a ka gelh thute bang. 4Huchu na sim chiangun Khrist thuguuh kiphual ka heetdan na hesiam diing uhi). 5Huchu tulai a sawlleh siangthoute leh zawlneite kawma Hagau a heetsaha a um bangin, nidang laiin mihing tate kawmah heetsah in a um ngei sih hi; 6Huchu hi ahi, tanchinpha jiahin Khrist ah Jentelte chu gouluahpihte, tahsa khata umte, thuchiam tanpihte ahi diing uh. 7A silbawltheihna natohna a, a thawna Pathian hehpihna hung kipia dungjui a hu tanchinpha natong diing a siam ka hi. 8Jentelte kawma Khrist hauhsatdan hawldoh seeng guallouh thute soi diing a kei misiangthoute zousiah laha neupen sanga neuzaw kawmah hi hehpihna chu piah ahi. 9Kumtuanga kipana Jesu Khrist mang a sil zousiah siamtu Pathian a phual a um thuguuh kiphual kipawlkhawmna chu mi zousiah musah diingin; 10Huchi'n tu a vaan munte a lalna leh thuneihnate kawmah Pathian pilna chinteng kouhtuam jiaha heetsaha a um theihna diingin. 11I Lalpa uh Khrist Jesu a bawl a tup, a kumtuang silguat bang ngei in; 12Amah ginna jiahin eihaw’n amah ah haansanna leh muangtah a luut theihna i nei uhi. 13Hujiahin nanguh diing a ka gimthuaahte jiaha lungthuai lou diingin ka hung ngen hi, huchu na loupina uh ahi. 14Hikhu jiahin i Lalpa uh Jesu Khrist Pa ma ah ka khupdin a, 15Lei leh vaan a innkuan chinteng min phuaahkhiahnapa ma ah, 16A loupina hauhdan bang jel a, a Hagau jiaha mihing sungnung lama silbawltheihna a suhhaat a ahung umsah theihna diingin; 17Khrist chu ginna a na lungtang va a teen theihna diingin; nanguh lungsiatna a zungha leh kiptah a um a, 18Misiangthoute zousiah toh a letdan, a saudan, a saandan, huleh a thuuhdante na heetchian theihna diing uleh, 19Khrist lungsiatna heetphaah guallouh na hung heet va, Pathian taangchinna zousiaha suhdim a na um theihna diingun. 20Huchi'n eimaha tong jel silbawltheihna dungjui a i nget leh i ngaihtuah sanga loupizaw a bawltheitu kawmah, 21Khrist Jesu jiahin kouhtuam ah kumtuang in, a khang a khang in loupina umta hen. Amen.
Currently Selected:
EPHESITE 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.