EPHESITE 4
4
Pathian kouhna bang a umdan diingte
1Hujiahin kei, Lalpa a mitaang in, kouh a na umna utoh kilawm tawh a gamta diingin ka hung ngen hi. 2Kingaihngiamna leh thunuaigolhna zousiah, thuaahtheihna toh, lungsiatna a kithuahzoutuah chiat in; 3Lemna gui a kaankhawm a Hagau kipumkhatna chu vom tinten in. 4Kouh a na umna pen uh kinepna, mun khat a kouh na hih bangmah un, sapumkhat leh Hagau khat, 5Lalpa khat, ginna khat, baptisma khat, 6Pathian khat leh mi zousiah Pa, bangkim tunga um leh, bangkima um, huleh nanguh zousiaha um, a um hi. 7Hizongleh Khrist silthawnpiah tehna bangjelin hehpihna chu i kawm chiat ah piah in a um hi. 8Hujiahin ama’n, Tunglama a kaltouh laiin matte chu sal in a pui a, huleh mihingte kawmah silpiahte a pia hi, chi'n a soi hi. 9(Huchi'n, a kaltou chihchu, a masa in leimun ngiampente ah a kumsuh chih louh bangdang chihna a diai? 10A kumsuh pen chu sil zousiah a suhbukim theihna diing a vaan zousiah tungpeh a kaltoupa mah ahi). 11Huleh ama’n khenkhatte chu sawlleh, khenkhatte zawlnei, khenkhatte tanchinpha soitu, khenkhatte pastor, huleh khenkhatte chu thuhilhtu a pia hi. 12Misiangthoute suhbukimna diing leh, thunatohna natohna diing leh, Khrist sapum bawl hoihna diingin: 13Ginna leh Pathian tapa heetna lama kithutuaah a, piching a, Khrist taangchinna dungtan i phaah chiat masiah uh; 14Huchi'n dihlouhna heemna bangin, lepchiahpil a mihing heem a um a, thuhilhna huih chintenga lehlam lehlam a muutleeng lehleh naupangte hi nawnta louin, 15Hizongleh lungsiatna a thutah soi in, sil zousiah ah amah ah i khang tou thei zaw diing hi, amah chu lutang ahi, Khrist chu. 16Amah apat sapum pumpi kituaahtaha zopkhawm a um in, guhtuah chintengin sahiang dang chinteng natohna a piahdan dungjui chiat a, sapum chu lungsiatna a kibawl hoihin a khang tousah ahi. 17Hujiahin hi ka soi hi, huleh Lalpa ah ka hung hesah hi, Jentelte a lungsim tavai uh pua a, a um bangun um nawn sih un, 18A heetsiamna uh suhmial a um in, a sungva heetlouhna uh jalin Pathian hinna apat khen in a um uh, a lungtang uh ngon jiahin. 19Amahun heettheihna mawngmawng a neih nawn louh jiahun sil sianglou chinteng huaihamtah a bawl diingin huuhna ah a kipumpiahta uhi. 20Hizongleh nangun chu Khrist thu huchi bangin na zil sih uhi. 21Jesu a um, thutah dungjuia amah thu ja a amah thuhilh a um na hih photmah uleh, 22Na nidanglai umdan va mihing lui, heemna duhgawlna banga hoihlou deuhdeuh chu hawhkhia unla. 23Na lungsim hagau vah a thah in hung um un, 24Mihing thah, dihtatna leh siangthouna tah a Pathian banga siam in kithuam le u’chin, chih. 25Huchi'n zuau soi tawpsan in, mi chinin a veengte kawmah thutah soi chiat un; ajiahchu eihaw khat leh khat kihiangtuah chiat i hi uhi. 26Lungthah unla, sual chu sual sih un; na lungthahna uh ni in tumkhum sih heh. 27Diabol zong mun ot sih un. 28Guta in gu nawn sih henla, tasam kawm a piah diing a neih theihna diingin, a khuta sil hoih bawl in tonggim zaw heh. 29Na kam vapat thusia pawt sih henla, hizongleh a ngaikhetute kawma hehpihna a piah theihna diingin, bawl hoihna diingin thu hoih pawt zaw heh. 30Huleh Pathian Hagau Siangthou sulungngai sih un, tatna ni a diinga amah a chiamchih na hi uh. 31Khaatnate, lungthahnate, hehnate, haanate, kisoisiatnate, hite zousiah na lah vapat koihmang in umta heh, giitlouhna zousiah toh; 32Khat leh khat kingainatuah chiat unla, lungnem unla, Pathian in Khrist jiaha nanguh ahung ngaihdam bangin, nanguh zong kingaidamtuah chiat un.
Currently Selected:
EPHESITE 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.