EPHESITE 5
5
1Hujiahin ta deihtahte bangin Pathian umdan juitute hi un; 2Khrist in ahung lungsiat a, ei u’diing a Pathian kawma silpiah leh kithoihna namtui diinga a kipiah bangin, lungsiatna ah um un. 3Hizongleh misiangthoute umdan diinga kilawm him in, kingaihnate leh bolhhohna zousiah, huaihamna toh na lahvah lohkhaah in um sih heh; 4Zahmohthute, thu ngolhuai a houlimte, chiamnuih thute bang zong kilawm lou ahi; hute sangin kipaahthu soi zaw un. 5Ajiahchu kingaihhaat leh, mithanghuai leh, mihuaiham in (huchu milim bia ahi), Khrist leh Pathian gam ah tan mawngmawng a nei sih uh chih na he uhi. 6Mi koimah in thu meimei pouhin hung heem sih u’heh; ajiahchu hi silte jiahin Pathian lungthahna chu thumanglou tate tungah a tung veu hi. 7Hujiahin amahuh kithuahpih sih un. 8Bang jiahin ahiai i chih leh, nanguh tumalai in mial na hi va, tuin chu Lalpa ah vaah na hita uh; vaah tate bangin um un. 9(Ajiahchu, Hagau gah ahihleh hoihna chinteng leh dihtatna leh thutah ah ahi). 10Lalpa deihzawng bang aha chih en chian in. 11Huleh mial natoh gah neiloute toh kithuahkhawm na nei sih unla, hizongleh a dih louhdan hesah zaw un. 12Ajiahchu a guuh a, a silbawlte uh chu a soi zong a zumhuai hi. 13Hizongleh sil zousiah a dih louhdan heetsah a um chu vaah suhlat ahi; ajiahchu sil sulang photmah chu vaah ahi. 14Hujiahin ama’n, Nang ihmu khang inla, misi laha kipanin thou in, huchi'n Khrist in ahung salhvaah diing hi, a chi hi. 15Huchi'n na umdan uh pilvaang un, mingolte banga um louin, mipilte bangin um un. 16Nite a hoih louh jiahin hunlemtaang lei un. 17Hujiahin ngol sih unla, Lalpa deihzawng bang ahiai chih hesiam zaw un. 18Huleh uain kham in um sih unla, hu a’chu kisuum louhna a um hi; hizongleh Hagau a dim in um zaw un. 19Phatna late, Pathian late, huleh hagaulam late a nang uleh nanguh kihou in, na lungtang vah Lalpa diingin kituaahtah leh kilawmtahin la sa un. 20Bangkim tungah i Lalpa uh Jesu Khrist minin Pathian leh Pa kawmah kipaahthu soi ngiitngeet un. 21Pathian laudan siamna ah khat leh khat kituluuttuah chiat un.
Khristian innkuan umdan diing
22Jite haw, Lalpa kawma bangin na pasalte uh kawmah kituluut un. 23Ajiahchu Khrist kouhtuam lutang ahih a, sapum hundampa ahih bangin, pasal chu ji lutang ahi. 24Hujiahin kouhtuam Khrist kawma a kituhluut mahbangin, jite chu sil bangkimah a pasalte uh kawmah kituluut u’heh. 25Pasalte haw, Khrist in kouhtuam a lungsiat a, a luang va a kipiah bangin, nangun zong na jite uh lungsiat un. 26Amah u’chu tui a sil a, thu a, a suhsianga a sawpsiang theihna diingin, 27Huchia amahuh chu buahbaanglou, meelhemlou leh huchibang mawngmawng um lou; hizongleh siangthou leh soisiat bei, kouhtuam loupitah amah a kipiah theihna diingin. 28Hujiahin pasalte’n chu amahuh sapum bangin a jite uh a lungsiat diing uh ahi; A ji lungsiatpa chu amah kilungsiat ahi. 29Ajiahchu koimah in amah tahsa a haw ngei nai sih; Khrist in kouhtuam a chawm a, a deihthoh bangin, a chawm in a deihthoh zaw hi. 30Ajiahchu eite chu amah sapum leh, tahsa leh, guh hiangte i hi uhi. 31Hikhu jiahin pasal in a pa leh a nu a nuse diing a, a ji toh a kizop diing, huleh a nih un tahsa pumkhat ahung hita diing uhi. 32Hichu thuguuh kiphual loupitah ahi; hizongleh ke’n chu Khrist leh kouhtuam thu ahi ka soi. 33Banghitaleh, na lahva koipouh in amah a kilungsiat bangin a ji lungsiat heh; huleh ji chu a pasal zahtaat diingin pilvaang heh.
Currently Selected:
EPHESITE 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.