EPHESITE 6
6
1Naupangte haw, Lalpa ah na nulepate uh thu mang un; hichu sildih ahi. 2Na pa leh na nu zahtaat in; huchu chiam nei thupiah masapen ahi. 3Huchi'n nang a diingin a hoih diing a, leitung ah na damsawt diing hi. 4Huleh nanguh pate haw, na tate uh sulungthah sih unla, Lalpa thununna leh thuhilhna in enkol zaw un. 5Suaahte haw, Khrist thu na man bangun, laudan siam leh kiliing pum in lungsiangtahin tahsa daana na pute uh thu mang un. 6Mihing kipaahsah diing a mitmei chauh veeng hilou in, Khrist suaah bang a lungtang a Pathian deihzawng bawl zaw in: 7Mihing kawm a hilou in, Lalpa kawm a hoihlam deih a natong hiin; 8Mi chin in, suaah hiin, suaahlou hitaleh, sil hoih a bawl phot uh Lalpa kawm apatin humah a mu kiit diing uh chih he in. 9Huleh nanguh pute haw, huchimahbangin a kawmvah bawl un, amah uleh nanguh pu chu vaan ah a um chih leh, ama’n mi deihsah tuam a nei sih chih he in, vaubawl sih un.
Gingtute gaal leh a gaalthuam
10A tawppenin, ka unaute, Lalpa ah leh a haatna silbawltheihna ah haattahin um un. 11Diabol zeheemnate na dou zoh theihna diingun Pathian gaalthuam bukim in kithuam un. 12Bang jiahin ahiai i chih leh i dou uh chu tahsa leh sisan ahi sih a, lalnate, thuneihnate, hi khovel mial tunga vaihawmtute leh, vaan mun a hagau gilou umte ahi zaw uhi. 13Hujiahin ni hoihlou na douzoh na diing uleh, na bawl zohveh nung va zong na din theihna diingun, Pathian gaalthuam bukim la un. 14Hujiahin, na kawnguh thutah a gaah in, dihtatna awmphaw but in, 15Lemna tanchinpha kisahkhawl na chu na keeng va but in ding un. 16A bawn a tungah, ginna lum la un, hukhuin giloupa thal kuang thei zousiah na sumit thei diing uhi. 17Huleh hutdamna siihlukhuh leh Hagau namsaau Pathian thu la un; 18Haamteina leh ngetna chintengin bangchihlaipouhin Hagau a haamtei zing a um in, hulam pangah chu misiangthoute zousiah diingin thuaah haatna leh ngetsahna toh ngaihsah zing in um un. 19Huleh kei diingin zong, tanchinpha thukiphual hesah diing a haangsantaha ka kam ka kaah a, thusoitheihna piah a ka um theihna diingin. 20Hu diing a siihkolbut palai ka hi ngal a; huchia hulampang ka soi diing banga haangsantaha ka soi theihna diingin.
Thutawpna
21Hizongleh nangun zong bangchibanga ka um ka tanchin na heet theihna diingun, Tikika, Lalpa a unau deihtah leh thunatongtu muanhuai in bangkim ahung hilhpah diing hi; 22Ka tanchin uh na heetna diing uleh, na lungtang uh a hamuan theihna diing chi a amah na kawmva ka hung sawl ahi. 23Pa Pathian leh Lalpa Jesu Khrist kawma kipan hamuan na, huleh ginna leh lungsiatna unaute kawmah um hen. 24I Lalpa uh Jesu Khrist chihtahtah a lungsiatte zousiah kawmah hehpihna um hen. Amen.
Currently Selected:
EPHESITE 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.