PHILIPPITE 1
1
Chibaibuuhna
1Paul leh Timothi, Jesu Khrist suaahte’n, Philippi khua a um Khrist Jesu a misiangthou zousiah kawma leh, kouhtuam houtute leh upate kawmah; 2I Pa uh Pathian leh, Lalpa Jesu Khrist kawm a kipan hehpihna leh hamuanna na kawmvah um hen. 3Nanguh ka hung geeldoh chintengin ka Pathian kawmah kipaahthu ka soi hi. 4Na bawnva diing a kipaahtah a hung ngetsah a ka haamteina chinteng ah, 5A patni apat tuni tanpha a tanchinpha a na hung kipawlkhawmpihna uh jiahin; 6Amah na sungva na hoih pantu in, Jesu Khrist ni tanphain huchu a bawl mualsuaah ngei diing chih dettahin ka gingta hi. 7Na bawnva tungtaang thu a keima’n hichibang lungsim ka neih chu a dih mawng ahi; ajiahchu nanguh ka lungtang ah ka hung vom zing hi; ka kolbuhna leh, tanchinpha dihna thu leh suhkipna thu a ka hehpihna tanpihte na hi veh uhi. 8Ajiahchu, Jesu Khrist lainatna in nanguh na bawnun ka hung ngai mahmah chih Pathian ahung heetpihtu ahi.
A lehkhathot simtute diinga a haamteina
9Huleh heettheihna leh heetkhenna zousiah a na lungsiatna uh ahung tam semsem diing, hichu ka ngen ahi. 10Huchia sil hoih mahmahte na hung heettheih va; Khrist ni tan a, a tahtah leh suhsualbei na hung hihtheihna diingun. 11Pathian loupina leh paahtawina diinga Jesu Khrist a um dihtatna gah a dim in. 12Hizongleh, unaute, ka tunga siltungte hi tanchinpha dalh semna diing a hung tung ahi chih na heet uh ka deih hi; 13Huchi'n Kaisar innpi sungteng leh, mundang zousiah a mite kawmah Khrist a ka kolbuhna chu a langchianta hi; 14Huleh Lalpa a unau tamtahin ka kolbuh jiaha gingkip in, Pathian thu lau lou a soi diingin a haangsan deuhdeuhta uhi. 15Khenkhatte’n chu thangsiatna leh kinialna jiahin Khrist a taangkoupih va; huleh khenkhatte’n deihsahna jiahin zong a soi uh; 16Pawl khatte’n chu ka kolbuh a thuaahna belapsah tum in, a tahtah hilou in, kikalhna diingin Khrist a taangkoupih uh; 17Hizongleh pawl khat in chu tanchinpha gum diing a um ka hindan he in, lungsiatna jiahin a soi uhi. 18Bang a khawh ei? Lam chinteng ah, a heem hiin, a tah hileh, Khrist chu taangkoupih in a umta himhim ahi; huleh hu a’chu ka kipaah hi, ahi, ka kipaah diing hi. 19Ajiahchu hikhu in na haamteina uleh, Jesu Khrist silpiah jalin ka hutdamna ahung suah ngei diing chih ka he hi, 20Ka lametna mahmah leh ka kinepna dungjuiin bangmah ah suhzum in ka um sih diing a, hizongleh ka bawl zing mah bangin, tuin zong, ka hinna in aha, ka sihna in aha, Khrist chu ka sapum ah haansanna kimin suloupi in a um diing hi. 21Ajiahchu kei diingin hin Khrist ahi a, sih chu punna ahi. 22Hizongleh tahsa a hin hi ka tohgah ka tan diing hileh teel zawh diing ka he sih hi. 23Ajiahchu nih saikaah in chih diing zosaang he lou in ka um hi; chiahmang a Khrist kawma um utna ka nei a; huchu a hoihzaw mahmah a; 24Himahzongleh tahsa a um chu nanguh jiahin a poimohzaw hi. 25Huleh hi ginkipna nei in, na ginna uh khanlet na diing leh, na ginna va na kipaahna diingun ka um zing phot diing chih ka he hi. 26Na kawmva ka hung kiitna jiaha, kei diing a Khrist Jesu a na kipaahna uh a tamsem theihna diingin. 27Na umdan uleh Khrist tanchinpha kituaahsah phot un; hunga nanguh ka hung muh ahiai, ahihlouhleh ka um louha zong na tanchin uh, hagau khat a na dinkipdan uleh, lungsim khat nei a, tanchinpha thuginna a na pandan uh ka jah theihna diingin; 28Huleh bangmah ah na meelmate uh sulau in um sih un; huchu amahuh diing a manthaina chiamchihna dihtah ahi a, hizongleh nanguh diingin chu hutdamna, huleh huchu Pathian a kipan ahi. 29Ajiahchu, Khrist jiaha nangun amah na gintaat chauh uh hilou a, amah vang a thuaah zong na thuaah diing uh ahi chih piah na hi uhi. 30Keimaha hichibang kidouna na muhsa bang uleh, tu a keimaha um diing na jah bang uh, nangun zong na nei uhi.
Currently Selected:
PHILIPPITE 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.