GALATIATE 1
1
Chibaibuuhna
1Paul, sawlleh, (mihing apat hilou, mihing vanga zong hilou, Jesu Khrist leh Pa Pathian, misi lah akipana amah kaithoutu vang a hizaw) in, 2Huleh ka umpih unau zousiahte’n, Galatia gam a kouhtuamte kawmah; 3Pa Pathian leh i Lalpa uh Jesu Khrist kawma kipan hehpihna leh hamuanna na kawmvah um hen, 4Amah chu Pathian leh i Pa uh deihdan dungjuiin tulai khovel giloutah lah akipan ahung suahtaatsah theihna diingin i sualnate luang in a kipeta hi. 5Pathian kawmah loupina kumtuang kumtuang in um zingta hen. Amen.
Galatiate tung a Paul lungkiahna
6Khrist hehpihna a nanguh hung koutu apat tukikal a tanchinpha danga na kituan mei uh thumah ka sa hi; 7Huchu tanchinpha dang ahi sih a; hizongleh nanguh hung subuai in Khrist tanchinpha ahilou zawng a hei ut mi khenkhat a um ahi. 8Hizongleh keiuh hiin, vaan apat angel hitaleh, tanchinpha na kawmva ka soi uh loungal tanchinpha dang mawngmawng na kawmva hung soi a umleh haamseloh in um heh. 9Tuma a ka soi mahbangun tuin zong ka soi jel ahi, tanchinpha na muhsa pen uh loungal tanchinpha dang mi koipouh in na kawmva ahung soi leh haamseloh in um heh. 10Bang jiahin ahiai i chihleh ke’n tuin mihing ahiai ka zawl, Pathian ahiai? ahihlouhleh mihing suhlungkim tum ka hiai mah? mihing suhlungkim tum nalai hitaleng Khrist suaah ka hi sih diing hi.
Paul tanchinpha mihing a kipan ahih louhdan
11Huchi'n unaute, ka tanchinpha soi chu mihing lam thu ahi sih chih ka hung hesah ahi. 12Ajiahchu mihing apat ka muh zong ahi sih a, mi hung hilh zong ka hi sih, hizongleh Jesu Khrist kilaahna jiaha ka muh ahi zaw hi. 13Ajiahchu malai a Juda mite biah dana ka umlai a ka tungtaang, bangchi banga Pathian kouhtuamte theihtawpa sawi a, subuaitu ka hihdan na zata uhi. 14Huleh ka pulepate thugousiah a phatuam ka ngaih diahkhol jiahin Judate biahdan lama zong ka chipihte laha ka khangual tampi kana khup hi. 15Hizongleh ka nu gilsunga ka umlai apat hung koihtuamtu leh, a hehpihna a hung koutu Pathian in, 16Jentelte laha a tanchinpha ka soi theihna diingin a Tapa chu keimaha kilaahsah pha a sah laiin tahsa leh sisan ka dong sih a, 17Jerusalem khua ah, kei sanga sawlleh hi masate kawma zong ka chiahtou sih a; Arabia gam ah ka chiah zaw a, huin Damaska khua ah ka hung kileh kiitta hi. 18Huin kum thum nungin Jerusalem ah Peter kimuhpih diingin ka chiahtou a, a kawmah ni sawm leh ni ngaa ka va um hi, 19Hizongleh Lalpa sanggampa Jakob chih louh sawlleh dangte khatbeeh ka mu sih hi. 20Tuin na kawmva ka thu gelhte, en un, Pathian ma ah ka zuau lou ahi. 21Hunungin Syria leh Silisia gam ah ka hungta hi. 22Huleh Judia gam a Khrist a um kouhtuamte meelheet louhin ka um nalai hi. 23Hizongleh, tuma a eiuh hung sawipa’n khatvei laia a suhsiat taah ginna chu tuin a taangkoupihta, chih thu chauh a ja uhi. 24Huleh amahun keimah ah Pathian a paahtawita uhi.
Currently Selected:
GALATIATE 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.