GALATIATE 3
3
Ginna a Hagau silpiah muh
1Aw Galatia mingolte, na lahva, na mitmuh ngei va Jesu Khrist chu kilhbeh a chiantah a kipuangta, hu thutah chu jui lou diing a kua’n hung bumngol ahitai? 2Na lahva kipan hi chauh ka he nuam hi, Daan silte bawl jiahin ahiai Hagau chu na muh uh, ahihlouhleh na ngaihkhiah va na gintaat jiahun? 3Hichi lawmin na ngol uh ahi maw? Hagau a pan zouta in, tahsa a subukim diing na hi uh maw? 4Sil huzahpi a thawn a thuaah na hi viai mah? a thawn bang hitaleh. 5Hujiahin na kawmva Hagau hung petu leh, na lahva silmah bawltu in daan silte bawl jiahin ahiai a bawl, ahihlouhleh na ngaihkhiah va na gintaat jiahun? 6Abraham in Pathian a gingta a, huchu a dihtatna a sehsah ahih mahbangin. 7Hujiahin ginna a umte, hute mah chu Abraham tate ahi uh chih he un. 8Huleh Pathian lehkhathu in, ginna jiahin Pathian in Jentelte siam a tangsah diing chih helawh in, Abraham kawmah, Nangmah ah nam zousiah vangpiahin a um diing uh, chih tanchinpha ana soita hi. 9Huchi ahihjiahin ginna a umte chu mi ginum Abraham toh vangpiahkhawm in a um uhi. 10Bang jiahin ahiai i chihleh daan silbawlte a um photmahte chu haamse nuai a um ahi uh; ajiahchu hichibanga gelh ahi, Daanbu a bawl diing a kigial zousiah jui zing lou chu haamsiat in a um uhi. 11Hizongleh Pathian mitmuh in koimah daan a siamtang a um sih uh chih a lang chian hi; ajiahchu, Midihtat chu ginna in a hing diing, chih ahi. 12Huleh daan chu ginna a suaah ahi sih a, hizongleh, Huchibang a bawltu chu hute ah a hing diing hi, chih ahi zaw hi. 13Khrist chu ei luang a haamsiata hung um in, daan haamsiatna apatin ahung tandohta hi; ajiahchu hichibanga gelh ahi, Singdawna khailup photmah chu haamse thuaah ahi uh. 14Huchi'n Abraham tunga vangpiahna chu Jesu Khrist jala Jentelte tunga ahung um a, eihawn Hagau chiam chu ginna jala i muhtheihna diingun ahi. 15Unaute, mihing daanin ka soi ahi; hichu mihing thuhun hitamahleh, suhkip ahih inchu koima’n a phel ngei sih a, beh zong a behlap ngei sih uhi. 16Huleh Abraham leh a haah kawmah ahi thuchiam chu na kipia. Ama’n tampite soina bangin, Chihaahte kawmah, a chih sih a, mi khat tungthu soi bangin, Na chihaah kawmah, a chih zaw hi, huchu Khrist ahi. 17Huleh hichu ka soi ahi, Pathian in Khrist a, a suhkipsa thuhun chu, kum ja li leh kum sawmthum nunga hung um daanin thuchiam chu bangmahlou suaah diingin a sumang thei sih hi. 18Gouluah diing chu daan jiah ahihleh, thuchiam jiah ahita sih diing hi; hizongleh Pathian in thuchiam jiahin Abraham ana peta hi.
Daan siltup chu
19Ahihleh bang diinga daan um ahiai leh? Hichu, chihaah, a kawma thuchiam piah a umpa ahung masiah, bohsiatna jiahin behlap in a um a, angelte zanga palai khut a suhkip ahi. 20Huleh palai chu mi khat chauh palai ahi sih a, Pathian ahihleh khat ahi. 21Ahihleh daan chu Pathian thuchiam kalh ahiai mah? Hi lou hial; hinna pe thei daan ana kipeta hitaleh siamtansahna chu daan jiahin a um ngei diing hi. 22Hizongleh Jesu Khrist gin jiaha thuchiam chu a gingtate a kipiah theihna diingin, Pathian lehkhathu in mi zousiah sualna nuaiah a khaahkhumta hi. 23Hizongleh ginna ahung tun ma in daan nuai a kol in ina um a, hung kilang diing ginna ah khaahkhum in i na um uhi. 24Huchi'n daan chu, ginna jiaha siam i tantheihna diing a Khrist kawma hung pui diing, i hilhtupa uh ana hi hi. 25Hizongleh ginna ahung tun nungin hilhtupa nuaiah i um nawnta sih uhi. 26Ajiahchu na bawnun Khrist Jesu ginna jiahin Pathian tate na hi uhi. 27Bang jiahin ahiai i chihleh na lahva Khrist a baptisma tang photmah chu Khrist a kithuam na hita uhi. 28Huah chu Judami, Grik mi a um nawn sih; saltaang leh zalen zong a um nawn sih; huleh pasal leh numei zong a um nawn sih hi; ajiahchu na bawnun Khrist Jesu ah pumkhat na hita uhi. 29Huleh Khrist a na hih unchu, Abraham haah, thuchiam dungjui a gouluah diingte na hi uhi.
Currently Selected:
GALATIATE 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.