GALATIATE 4
4
Khrist ginna jala Pathian ta hihna
1Hizongleh hichi'n ka chi hi, Gouluahtu diing chu bangkim tunga houtu hizongleh naupang ahih laisiah, suaah toh kilimdanna a nei tuan sih hi. 2A pa hunguat a tun masiahin a dontute leh a enkoltute nuaiah a um zaw hi. 3Huchibang mahin ei zong naupang i hih laiin khovel thubulte nuaiah suaah in ina um uhi. 4Hizongleh a hunbi ching ahung tuntahin, Pathian in a Tapa, chu numei suanin, daan nuai a bawl in ahung sawlkheta hi, 5Ta hihsahna i muhtheihna diing a, daan nuai a umte tankhe diingin. 6Huleh ta na hih jiahun Pathian in a Tapa Hagau chu, Abba, Pa, chia kikou in na lungtang vah ahung sawlkheta hi. 7Huchi'n suaah na hi nawn sih a, ta na hi zawta hi; huleh ta na hihleh, Khrist jala Pathian gouluahtu diing zong na hi hi. 8Huchi hitamahleh, Pathian na heet ma un, a pianzia mawng va pathian hiloute nna nana tong uhi. 9Hizongleh tu a Pathian na hung heet nung va, ahihlouhleh Pathian heet mi na hung hihzawh mah nung va, bang diinga thubul zawngkhal leh manlouhte suaah a luut kiit ut a, kiheikiit na hi viai? 10Nite, hate, hunte leh kumte na tang veu uh. 11Bangchi aha in na tungvah ka tonggim thawnkha diing chih ka hung lausah hi. 12Unaute, ka hung ngen hi, keimah bangin um un; ajiahchu kei zong nanguh bangin ka um hi; ka bangmah na suse hial sih uhi. 13Na kawmva tanchinpha ka soi masatna pen chu ka tahsa haatlouhna pum in ahi chih na he uhi. 14Huleh ka tahsa a nanguh diing a ze-etna um chu na musit sih va, nual zong na nual sih uh, hizongleh Pathian angel bang leh, Khrist Jesu bang hialin na hung pom zaw uhi. 15Ahihleh vangpha na kisahna uh khoi a um ahitai? Ajiahchu, hithei hile bawn na mit uh kheidoh in na hung pe hial diing uh chih heetpihna ka hung nei hi. 16Huchi a thutah ka hung hilh jiahin na meelma uh hung hita ka hiai mah? 17Amahun phatuamngaitahin nanguh ahung hawl va, a hoih lamin ahi sih hi; nangun amahuh na hawl theihna diing va, hung poseh tum ahi zaw uhi. 18Hizongleh bangchihtan a a hoih lam a phatuamngaitah a hawl a um zing chu a hoih hi, na kawmva ka um sung chauh hilou in. 19Ka naute aw, nanguh a Khrist siam piching a a um masiah nausuaahnat thuaahin ka hung thuaah kiit hi, 20Tuin na kawmva um a, ka aw suhlimdang ka ut ngei mai; ajiahchu na tung thu uh ka hung lauthawngpih hi. 21Hung hilh un, nanguh daan nuaia um utte, daanthu ngaikhe lou na hi viai mah? 22Ajiahchu hichibang a gelh ahi, Abraham in tapa nih a nei a, khat chu a suaahnu toh, huleh khatpen chu a suaahlounu toh. 23Hizongleh suaahnu laha chu tahsa daan a piang ahi a; suaahlounu laha pen chu thuchiam jiaha piang ahi, chih. 24Hi thu hi tehkhinna ahi; hi numei nihte chu thuhun nihte ahi uh; khat chu Sinai taang apat sala taang diinga ta neinu ahi a, huchu Hagar ahi. 25Huleh Hagar chu Arabia gam a Sinai taang ahi a, tulaia um Jerusalem, huleh a tate toh sala taang khawm kisoina ahi. 26Hizongleh tunglam Jerusalem chu a zalen a, huchu i bawnva nu ahi. 27Ajiahchu hichi'n a kigial hi, Nang, ta nei lou a chiingnu, nuamin; nang, nausuaahnat thuaahlounu, ngaihtahin kikoudoh in; ajiahchu pasal neinu sangin a tang a umnu in ta a nei tamzaw hi chih. 28Huchi'n unaute, eiuh chu Isaak banga thuchiam tate i hi uhi. 29Hizongleh hulaia tahsa daan a piangin Hagau daan a piang a sawi bangin tuin zong huchi ahi. 30Ahihvangin lah Pathian lehkhathu in bang ahiai a soi? Suaahnu chu a tapa toh delhmang un; suaahnu ta pa in suaahlounu tapa toh gou a luahkhawm sih diing hi, a chi hi. 31Huchi'n unaute, suaahnu tate i hi sih a, suaahlounu tate i hi zaw uhi.
Currently Selected:
GALATIATE 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.