GALATIATE 5
5
1Hujiahin suaah hi nawn lou diing a Khrist in ahung zalensahna ah ding kip unla, suaah ngawngkol ah taang kiit nawn sih un. 2Ngai un, kei Paul in na kawmva ka soi ahi, zeh na tan uleh Khrist nanguh diingin bangmah phatuam lou diing ahi. 3Ajiahchu zehtante zousiah kawmah, daan zousiah juih diing na bat ahi, chih ka hung hesah kiit hi. 4Nanguh, daan a siam kitangsah pouhmahte, Khrist chu nanguh diingin a phatuam lou ahita a, hehpihna na puuhsanta uhi. 5Ajiahchu kei un Hagau jalin ginna a siamtanna kinepna chu ka ngaah uhi. 6Bang jiahin ahiai i chihleh Jesu Khrist ah zehtan bangmah a phatuam sih a, zehtan louh zong bangmah a phatuam sih hi; lungsiatna a tong ginna chu a phatuam hi. 7Hoihtahin na tai uh ka sa a, thutah jui lou diingin kua’n ahiai nanguh hung daal? 8Hi heemna chu nanguh hung koutu apat ahi sih hi. 9Tol tawmtakhat in tanghou beupi a jelsuaah hi. 10Nangun lungdang na geel sih diing uh chih Lalpa ah ka hung muang hi; hizongleh nanguh hung subuaitu in, koi hita zongleh, a tunga thupuuh chu a thuaah diing hi. 11Huleh unaute, ke’n zehtan thu soi nalai hileng, bang diinga sawihna thuaah nalai ka hiai? Huchi ahihleh kros a kipalpuuhna chu suhbei ahita diing hi. 12Nanguh hung subuaite kisaatkhe hial maileh ka ut hi. 13Ajiahchu, unaute, zalen diing a kou na hi uh a, na zalenna uh tahsa diing a lemtaanna in zang sih unla, lungsiatna in khat leh khat nna kitohsah zaw un. 14Ajiahchu, nangmah na kilungsiat bangin na inn veengte na lungsiat diing ahi, chih thuteng khatah daanthu zousiah suhbukim in a um hi. 15Hizongleh na kikeih va, na kineehtuah uleh na kisuhmang louhna diingun pilvaang un. 16Huchi'n hi ka soi ahi, Hagau ah um un, huleh tahsa utna na sutaangtung sih diing uhi. 17Ajiahchu tahsa in Hagau a dou a, Hagau in tahsa a dou hi; sil na bawltumte uh na bawl theih louhna diingun, hite chu a kikalhtuah veu uh ahi. 18Hizongleh Hagau pui a na um unchu daan nuaia um na hi sih uhi. 19Huleh tahsa silbawlte chu a kilang hi, huchu hite ahi; aangkawmna, kingaihna, thanghuaina, huuhna. 20Milimbiahna, bumna, muhdahna, kihauna, thangsiatna, lungthahna, kilanna, kikhinna, gintuamna, 21Deihgohna; tualthahna, zukhamna, eltol gualnop bawlna leh huchibang dangdangte ahi; huchibang silbawlte’n Pathian gam a luah sih diing uh, chi a malai a ka hung hilh taah mah bangin, ka hung hilh khawl hi, 22Hagau gah ahihleh, lungsiatna, kipaahna, hamuanna, thuaahtheihna, jainemna, hoihna, ginumna, 23Thunuaigolhna, kisuumtheihna, ahi; hichibangte kalhin daan a um sih hi. 24Huleh Khrist a hi mite’n tahsa chu a lunggulhna leh a duhgawlna toh a kilhbehta uhi. 25Hagau a hing i hihleh, Hagau mah ah i um diing uh, 26Khat leh khat kilang leh kithangsiat a um louin, a mawh a kiloupisah i tum sih diing uhi.
Currently Selected:
GALATIATE 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.