GALATIATE 6
6
Hinkhua thah a umdan diing tuamtuam a hasotna
1Unaute, mi kua aha a suhkhelhna a matdoha a um leh, nanguh hagau mite’n, nangmah ngei zong heemna na tuaahkha diing chih ngaihtuah in, huchibang mi chu thunuaigolhtahin tung diing kiit un. 2Khat leh khat na puaahgih uh kidawn chiat unla, huchi'n Khrist daan juikim un. 3Ajiahchu mi bangmah hiloupi a a kingaih saang leh amah leh amah a kihem ahi. 4Hizongleh mi chinin amah natoh kietchian chiat zaw heh, huchi'n midang tung hilou in, amah chauh tungah suan diing a nei diing hi. 5Ajiahchu mi chinin amah puaah chiat kipuaah diing ahi. 6Thuhilh a umpa in a hilhtu kawmah sil hoih zousiah pephal heh. 7Heem in um sih un; Pathian chu muhsit gual ahi sih hi; ajiahchu mi’n a tuh phot uh, humah chu a aat kiit diing uhi. 8Ajiahchu tahsalama tuhpa’n tahsalama siatna a aat diing a; hizongleh Hagau lama tuhpa’n chu Hagau a kumtuang hinna a aat diing hi. 9Huleh sil hoih bawl i chimtaah sih diing uh; ajiahchu i lungkiah louhleh a hun tahin i aat diing uhi. 10Hujiahin hun lemtaang i neih bangjelin mi zousiah kawmah sil hoih i bawl diing uh, a diahkhol in ginna a i innkuanpihte kawma i bawl diing uhi. 11Keimah khut ngei a, na kawmva jem golpipia lehkha ka hung gelh en un. 12Tahsa a kilat hoih tum photmahte’n zehtan diingin nanguh ahung sawl teitei uh; bangmah dang hilou in, Khrist kros jiaha sawihna a thuaah louhna diingun ahi. 13Ajiahchu, amahuh zehtante mawngin zong daanthu a jui tuan sih uhi, na tahsa va suan diing a neih theihna diingun zehtan le u’chin chih a deih phet uh ahi. 14Hizongleh ke’n chu i Lalpa uh Jesu Khrist kros loungal ka suang het sih diing hi; amah jiahin khovel kei diingin kilhbeh ahita a, kei khovel diingin kilhbeh ka hita hi. 15Ajiahchu Khrist Jesu ah chu, siamthahna loungal, zehtan bangmah a phatuam sih a, zehtan louh zong bangmah a phatuam sih hi. 16Huleh hi daan banga umte tengteng tungah hamuanna leh khotuahna um hen, huleh Pathian Israelte tungah zong. 17Tua kipanin koima’n hung subuai nawn sih heh, ajiahchu ka tahsa ah Lalpa Jesu chiamtehna ka pua hi. 18Unaute, i Lalpa uh Jesu Khrist hehpihna na hagau uh kawmah um hen. Amen.
Currently Selected:
GALATIATE 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.