HEBRAITE 10
10
Khrist kithoihna bawl in Mosi daan a kithoihnate a kheel
1Daanthu chu sil hoih hung um diingte liim giap ahi a, a kibatpih tah ahih louh jiahin, hu kum chin a kithoihna a lat veute un ahung naihtute a bukimsah zou sih hi. 2Huchi hilouleh a lat uh tawpta lou diing ahiviai mah? Ajiahchu a betute chu khatvei suhsiangthou a um in sual kiheetna a nei nawn sih diing uhi. 3Hizongleh hu kithoihnate ah chu kum chinin sualnate heetdoh kiitna a um veu hi. 4Ajiahchu bawngtalte leh keelte sisanin sualnate la mangthei gual ahi sih hi. 5Huchihjiahin khovela ahung lai in, ama’n, Kithoihna leh sillat na deih sih a, hizongleh sapumkhat na hung bawlsah zaw hi; 6Pumhaal silpiahte leh sualna kithoihnate ah nangma’n kipaahna na nei sih hi, a chi a. 7Huin keima’n, ngai in, (lehkhabujial a keimah thu gelh ahi, ) na deihzawng bawl diingin ka hung hi, Aw Pathian, ka chi a. 8A tungah, Kithoihna leh silpiah leh pumhaal sillatte leh sualna kithoihna na deih sih a, huah kipaahna zong na nei sih hi; hute chu daanthu banga lat ahi, a chih phetin, 9Ama’n, ngai in, na deih zawng bawl diingin ka hung hi, Aw Pathian, a chi hi. A nihna a tunding theihna diingin ama’n a masapen chu a lamangta hi. 10Hu deihzawng lam a Jesu Khrist sapumkhatvei setden diing a lat jiahin suhsiangthou in i umta uhi. 11Huleh siampu chinin niteng a nna tongin sualnate lamang theilou kithoihna ngeimah laan in a ding zing uhi. 12Hizongleh ama’n chu kumtuang a diinga sualnate diinga kithoihna khat a lat nungin Pathian jiatlam ah a touta hi. 13Hunung siah chu a meelmate a keengngahna a bawl ahih masiah uh a ngaah zingta hi. 14Ajiahchu ama’n sillat khat in suhsiangthousate chu kumtuang a diingin a subukimta hi. 15Huleh Hagau Siangthou in zong i kawmah ahung hesah hi; ajiahchu ama’n, 16Hu nite nung chianga a kawmva ka thuhun diing chu hi ahi, Lalpa’n a chi, A lungtang vah ka thupiahte ka koih diing a, huleh a lungsim vah ka gial diing hi, a chih zoh nungin, 17A sualnate uleh a tatleehnate u’chu ka he zing nawn sih diing hi, a chitou nalai hi. 18Huchi'n huchibangte ngaihdamna umna photah sualna a diinga sillat a um nawn sih hi.
Kihasotna leh vauna
19Hujiahin unaute, Jesu sisan jiaha mun siangthoupen a luut ngamna nei in, 20Eiuh diing a ahung bawlsah lamthah le hing ah puanjah (huchu a sapum chihna ahi,) kaantan in; 21Huleh Pathian innkuanpihte tunga siampu lal khat i neih jiahin; 22Sialepha heetna hoihlou apat i lungtang uh thehsiang a um in, i sapum u’zong tui chiima sil a um in, huleh ginna heetchi ana lungtang dihtah toh i naih diing uhi. 23I ginna thuphuan pen uh lawng lou keeiin i tudet diing uhi; Ajiahchu amah thuchiam hung petu chu a ginum hi. 24Huleh lungsiatna leh silhoih bawlna lama kitohthou diingin khat leh khat i kingaihtuah diing uh. 25Khenkhatte banga i kikhopnate uh tawpsan lou in; himahleh khat leh khat kihasottuah zaw in; huleh ni ahung nai hulhul chih na heet un kihasottuah sem un. 26Bang jiahin ahiai i chih leh thutah heetna i neih nung a i sual teitei inchu, sualnate diing a kithoihna a um nawnta sih a, 27Hizongleh vaihawmna ngaah zing lauhuai bang aha leh, doutute kaang mang diing lungthahna mei a um zawta diing hi. 28Mosi daan poisa lou mi chu heetpihtu nih leh thum thu in lainatna bei in a si veu uhi. 29Pathian Tapa tuandeen a, thuhun sisan amah suhsiangthouna chu sil sianglou a ngai a, huleh hehpihna Hagau simmohbawl chu, hu sanga bangchituha gawtna loupizaw ahiai thuaahleh kilawm a na ngaihtuah uh? 30Ajiahchu, Phuba mawngmawng kei laah diing ahi, keima’n ka thuh diing hi, Lalpa’n a chi, chih leh, Lalpa’n a mite vai a hawmsah diing, chia soitu amah chu i he uhi. 31Pathian hing khuta puuh chu sil lauhuaitah ahi. 32Hizongleh masang laia, suhvaah a na um nung va, thuaahna hahsatahte na thuaah lai nite uh ngaihtuah kiit un; 33Thu khat a’chu muhsitna leh hahsatnate thuaah in na um va; thu khatah ahihleh, huchibang a bawl a umte thuaahpihtute na hung hi uhi. 34Bang jiahin ahiai i chih leh, nangun ka kolbuhnate ah na hung lainat va, vaan ah gou hoihzaw leh, um zing diing na neih uh kiheet in, na thuampua uh hung laahsahte u’zong kipaahtahin na thuaah zota uhi. 35Hujiahin kipaahman loupitah mai mu diing a na muanna u’chu paaikhe hial sih un. 36Bang jiahin ahiai i chih leh Pathian deihzawng na bawlzoh va, silchiam chu na muhtheihna diingun na kuhkal uh a ngai hi. 37Ajiahchu tomkhat zohchiangin ahung diingpa chu ahung diing hi, sawt a hal nawn sih diing hi. 38Huchi'n midihtat chu ginna in a hing diing a; hizongleh a nungtolh inchu ka lungsim in amah ah kipaahna a nei sih diing hi. 39Hizongleh eiuh chu mangthai diing a nungtolh haw laha mi i hi sih va; hinna humbit diing a gingtahaw laha mi i hi zaw hi.
Currently Selected:
HEBRAITE 10: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.