HEBRAITE 11
11
Ginna a mi minthangte
1Huleh ginna chu sil kinepnate heetchetna, sil muhlouhte um ngei a heetna ahi. 2Ajiahchu hi thu ah upate’n paahtaat a loh uhi. 3Ginna jalin khovelte chu Pathian thu a suhtuah khawm ahi chih i he a, huchi'n sil kimute zong sil kilangte a siam ahi sih hi. 4Ginna in Abel in Kaina sangin kithoihna hoihzaw Pathian kawmah a laan a, hukhu jiahin midihtat ahi chih heetsahna a loh a, Pathian in a silpiah thu ah a heetpih a; hukhu jiahin sita hinapi in thu a soi nalai hi. 5Ginna in Enok chu sihna mulou diingin laahmang in a um a; huleh Pathian in a laahmang jiahin muh in a umta sih; laahmang a, a um ma in Pathian a kipaahsah hi chih heetsahna a nei hi. 6Hizongleh ginna louin chu amah kipaahsah gual ahi sih hi; ajiahchu Pathian kawma hung inchu amah a um chih leh, amah guntuhtah a hawltute kawma kipaahman petu ahi chih a gintaat diing ahi. 7Ginna in Noah chu sil muh nailouhte thu Pathian hilh a na um in, a lau a, a innkuanpihte hutdamna diingin kuang a bawl a; hukhuin khovel siamlouh a tangsahta a, ginna jiaha um dihtatna gouluahtu ahung hita hi. 8Ginna in Abraham chu, a nung chianga gou a hung tan diing mun a chiah diing a kouh a, a um laiin a thumang a; huleh a chiahna lam diing zong he lou in a chiahdoh hi. 9Ginna in gam chiamah mi gam a taam bangin ana taam zing a, thuchiam kibang a a gouluahpih diingte Isaak leh Jakob toh puaninn a teeng khawmin; 10Ajiahchu ama’n innbul kiptah nei, Pathian sah leh bawl khopi chu a ngaah ahi. 11Ginna in Sara in zong naupaai theihna a nei a; a chiamtu chu muanhuai a, a seh jiahin a teeh nungin ta a nei hi. 12Huchi'n a sisa tobang mi khat apatin vaan a aahsite bang a tam leh, tui khang lian gei a piauneel banga simseeng louh ahung suaahta hi. 13Hutehaw zousiah chu ginna nei in a sita va, silchiamte chu tang louin, hizongleh gamlatah apat gaalmuh in a pomkip va, leitung ah chu mikhual leh khualzin ahi uh chih ana phuangta uhi, 14Ajiahchu hutobang thu soite’n chu gam tuam khat a hawl uh chih chiantahin a sulang uhi. 15Huleh amahun ahung pawtna gam uh lunggulh leh u’chu, kihkiitna hun lemtaang ana muta tham diing uhi. 16Hizongleh gam hoihzaw deih ana hi va, huchu vaan gam ahi a; hukhu jiahin Pathian chu a Pathian uh chih a kouh a zum sih hi; ajiahchu amahuh diingin khopi khat guatsa’n a koihta hi. 17Ginna in Abraham in, ze-et a, a um in, Isaak a laan a; thuchiamte tangpa’n a tapa neihsun a laan hi. 18Isaak ah na haahte a kichi diing, kichipa ngei chu. 19Pathian in misi lah apatin zong a kaithou thei hi chi a geel in; hua kipanin etsahna in muh zong a mu kiitta ngei hi. 20Ginna in Isaak in sil hung tung diingte thu ah Jakob leh Esau a vangpiah hi. 21Ginna in Jakob in a sih kuanin, Joseph tate geel a vangpiah a; a chiangphut dawn a kinga in Pathian a bia hi. 22Ginna in Joseph in a sih diing kuanin Israel tate pawtkhiah diing thu a soi a; huleh a guhte tungtaang ah thu a pia hi. 23Ginna in, Mosi chu a pianlai in, naungeeh meel hoihtah ahi a chih jiahun, ha thum sung a nulepa phualin a um a; kumpipa thupiah zong a lau sih uhi. 24Ginna in, Mosi in ahung pichin nungin, Pharaoh tanu tapa chiha um diing a ut sih a. 25Tomchakhat sung sual nopna mun sangin, Pathian mite toh bawl gentheihna thuaah a teel zota hi; 26Khrist kimuhsitna chu Aigupta gam goute sanga hauhsatna loupizaw a ngaiin; ajiahchu a kipaahman muh diing lam chu a en zing hi. 27Ginna in ama’n kumpipa lungthahna lau louin Aigupta gam a nusia a; muhtheih louhpa chu muhtheih banga sepin a thu ah mualsuaah hi. 28Ginna jalin chiahkaan kuut leh sisan thehna a bawl hi, ta masa sulumtu in amahuh a khoihkhaah louhna diingin. 29Ginna in amahun leigaw tunga pai bangin Tuipi san a kaan va; Aigupta mite’n hubangin bawl a tum va, tui ah a tumta uhi. 30Ginna in Jeriko kulhbaang chu ni sagih a velh nungun a chimta hi. 31Ginna in nohchizuahnu Rahab zong ginglou mite toh a mangthaikhawm sih hi, ama’n enkhetute hamuangtah a ana zintun jiahin. 32Huleh bang ahiai ka soi naahlai diing? Gideon thute, Barak thute, Samson thute, Jephtha thute, David thute, Samuel thute leh zawlneite thu soi diing chileng, hunin ahung daih sih diing hi. 33Hute’n chu ginna in gamte a la va, dihtatna a bawlkhia va, thuchiamte a tang va, humpibahneite kam a chihsah va, 34Mei silbawltheihna a sudaai va, namsaau mahiam a peel va, haatlouhna apatin haatsah in a um va, kidouna ah a haat mahmah va, a gaalte uh pangkhawm a delhjah uhi. 35Numeite’n a misi uh thou kiit a mu va; mi dangte zong gimthuaahsah in a um va, thohkiitna hoihzaw a muhna diingun, hutkhiahna a deih sih uhi. 36Huleh mi dangte’n chu nuihzat bawlna leh vuaahna bang a thuaah va, ahi, hulou zong kolbut leh suangkul a khum bangin a um uh; 37Suang a seh in a um va, singaat a aattan in a um va, namsaau a saatlup in a um va; belaam vun leh keel vun silh in a vaah vai va; gentheitahin, gimthuaah in, sawih in a um uhi. 38(Hute a diingin chu khovel umna taah ahi sih hi; ) gamdaite ah bang, taang ah bang, kawlbuuh ah bang, leikohawm ah bang a vaah lehleh uhi. 39Huleh hite zousiah in a ginna jiah va phatna loh zou in, silchiam a tang sih uhi. 40Ajiahchu eihaw tellou a amahuh suhbukim a, a umlouhna diingin Pathian in eihaw diingin sil hoihzaw khat guatsa in a koih hi.
Currently Selected:
HEBRAITE 11: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.