HEBRAITE 8
8
Khrist siamputna chu Aaron siamputna tunga ahi
1Huchi'n i thusoite laha a poimoh pen chu hikhu ahi; vaante a Tungnungpen laltouphah jiatlam a tou, huchibang siampu lal i nei ahi. 2Mihing bawl hilou a, Lalpa bawl, mun siangthou leh biahbuuh tahzet a thunatongtu chu. 3Ajiahchu siampu lal zousiah chu silpiahte leh kithoihnate laan diing a guat ahi va; huchihjiahin hi siampu lal in zong bang ahakhat lat diing a neih a kiphamoh hi. 4Leitunga ana um hile zaw, daan thu bang jel a silpiahte laantu siampute ana um jiahun, siampu in a pang hial sih diing hi. 5Hute chu vaan silte etsahna leh a liima zat ahi a, Mosi’n biahbuuh bawl diing a, a kisah lai a, Pathian in a hasot bangin; ajiahchu ama’n, taang tunga etton diing a hung kimusah dungjuiin sil zousiah bawl diingin pilvaang in, a chi hi. 6Hizongleh tuin chu thuchiam hoihzawte tung a siam thuhun hoihzosem palai ahih bang jelin natohna hoihzaw ana tangta hi. 7Bang jiahin ahiai i chih leh hu thuhun masapen demna bei ana hitaleh, a nihna pen diing mun kingaihtuah lou diing ahi. 8Ajiahchu ama’n amahuh dem in, ngai un, Israel innkuante leh Juda innkuante toh thuhun thah ka siam hun diing nite hung tung diing ahita, Lalpa’n a chi hi; 9Aigupta gam a kipana a pulepate uh puidoh diing a a khut va ka tuuh ni a a kawmva ka thuhun pen bang hilou in; ajiahchu amahuh ka thuhun ah a um zing sih va, huleh ke’n amahuh ka ngaihsah sih hi, Lalpa’n a chi hi. 10Ajiahchu hu nite nung chianga Israel innkuante kawma ka thuhun diing chu hikhu ahi, Lalpa’n a chi hi; A lungsim vah ka daan thupiahte ka koih diing a, a lungtang vah ka gial diing; huleh amahuh diingin a Pathian uh ka hi diing a, kei a diingin amahuh chu ka mite ahi diing uhi. 11Huleh amahun michinin, Lalpa he in; chih a innveengte leh, a unaute a thuhilh nawn sih diing hi; ajiahchu a neupen apat a lianpen tanin a bawnun ahung heta diing uhi. 12Bang jiahin ahiai i chih leh a dihtatlouhnate vah ka khotuah diing a, a sualnate uleh a bohsiatnate u’zong ka he zing nawn sih diing hi, chi'n. 13Ama’n, Thuhun thah, chi a a soi jiahin, a masapen chu a luisahta hi. Huchia hung lui a, hung upa chu a mang diingkuan ahita hi.
Currently Selected:
HEBRAITE 8: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.