HEBRAITE 7
7
Melkisedek siampu lal hihna sutzopna
1Bang jiahin ahiai i chih leh, hi Melkisedek, Salem kumpipa, Pathian tungnungpen siampu, kumpipate va that zou a hung pai kiit Abraham na dawnpa in, amah chu a vangpiah a; 2A kawmah Abraham in a neih zousiah sawm a khat a pia hi; a min umzia chu, a masapen in, dihtatna Kumpipa, hu baan ah Salem Kumpipa chihna ahi a, huchu lemna Kumpipa chihna ahi. 3Amah chu pa nei lou, nu nei lou, khanggui nei lou, um patni nei lou, hintawp ni zong nei lou; hizongleh Pathian Tapa bang a siam, tawpni nei lou a siampu a um zing ahi. 4Tuin chi haahtu Abraham ngei in gaal laah thuampuate sawm a khat a piahnapa, hipa loupidan ngaihtuah dihvua. 5Huleh Levi haahte laha siampu natohna mu photmahin daan thu dungjuiin mite lah apat sawmakhat laah diing thu a mu ngei uhi, chih chu, a unaute lah apat ahi, Abraham khaal a pawt himahleh uh. 6Hizongleh amahuh a kipana a khanggui suitel a umloupa’n chu Abraham apat sawmakhat a la a, thuchiamte neipa chu a vangpiahta hi. 7Huleh a neuzaw chu a lianzaw in vang a pia hi chih nialguallouh ahi. 8Huleh hi-ah chu mihing si jelte’n sawmakhat a tang uh; hizongleh huah chu amah a hing zing hi, chia a tanchin heetsah a umpa in a tang hi. 9Huleh Levi, sawmakhat tangtu in zong Abraham ah sawmakhat a pia hi, ka chi thei hi. 10Ajiahchu Melkisedek in a va lamtuah laiin, amah chu a pa khaal ah a um nalai hi. 11Hujiahin Levite siampu hihna a bukimna muhtheih hitaleh, (ajiahchu hi nuaiah mite’n daanthu ana mu uhi) Aaron umdan bang a chih hilou a, Melkisedek umdan bang a siampu dang ahung um a ngaihna bang ahiai? 12Ajiahchu siampu hihna ahung kihentaah jiahin, daanthu zong a kihen ahung kiphamohta hi. 13Bang jiahin ahiai i chih leh a tungtaang a hi thute kisoinapa chu namtuam a mi ahi a, hu nam laha mi chu kuamah maitaam a na tong a um ngei sih uh. 14Ajiahchu i Lalpa u’chu Juda nam apat hung piang ahi chih chiantahin a lang hi; hu nam thu ah chu Mosi’n siampu lam thu bangmah a soi sih hi. 15Huleh Melkisedek umdan banga siampu dang ahung um jiahin, ka thusoi uh a kichian sem hi. 16Amah chu tahsa thupiah daanthu bang a siam hilou in, hintawp nei lou silbawltheihna bang a siam ahi zaw hi. 17Ajiahchu, ama’n, Nang chu Melkisedek umdan bang a kumtuang a siampu na hi, chi'n a hesah hi. 18Bang jiahin ahiai i chih leh thupiah um masa chu haatlouhna leh phattuamna bei jiahin paihin a umta hi. 19Ajiahchu daanthu in bangmah a subukim sih a, hizongleh kinepna hoihzaw chu ahung poluut hi; hukhuin eihaw’n Pathian i naih uh ahi. 20Huleh kihaahsialna lou a hilou ahihjiahin amah chu siampu a siam ahita hi. 21Ajiahchu hu siampute chu kihaahsialna lou a siampu a siam ahi va; hizongleh amah chu, a kawm a, Lalpa a kihaahsial a, a lunghei kiit sih diing, Nang chu Melkisedek umdan bang a kumtuang a siampu na hi, chi a soitu kihaahsialna a siam ahi. 22Huchimahbangin Jesu chu thuhun hoihzaw sukiptu a siam ahung hita hi. 23Huleh amahuh chu sihna jiaha pandensah theih louh ahih jiahun, siampu chu ana tam ngei uhi; 24Hizongleh hi pa’n chu, kumtuang a um zing ahihjiahin siampu hihna hen theih louh a nei hi. 25Huchi'n amah a Pathian kawm a hungte chu, amahuh diing a ngetsah diing a, a hin zing jiahin, a tawpkhawh tanin a hundam thei hi. 26Ajiahchu huchibang siampu lal, misiangthou, nun se lou, buah baang lou, misualte laha kituamkoih, huleh vaante sanga saangzaw a siam chu eihaw a diingin a kilawm mawng ahi. 27Ama’n chu hu siampu lalte banga, nichin amah sualna jiaha kithoihna laan masa zet a, huzoh chianga mite sualna jiaha a lat a ngai sih hi; bang jiahin ahiai i chih leh ama’n hichu amah leh amah a kilat in setden diingin khatvei in ana zouta hi. 28Ajiahchu daanin mihing haatlouhna neite siampu in a siam veu hi; hizongleh kihaahsial thu, daan nung a hung um in chu, Tapa, kumtuang a diing a suhkimsa chu a guat zawta hi.
Currently Selected:
HEBRAITE 7: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.