HEBRAITE 6
6
1Hujiahin Khrist thubulte chu nusia in, pichinlam i manoh diing uh; silbawl sisa apat kisiihnate, Pathian lam a ginnate, 2Baptisma thute leh, khutngah thute leh, misi thohkiitna thute leh, kumtuang vaihawmna lam thuhilhnate chu bulphuh kiit nawnlou in. 3Huleh Pathian in pha a sah inchu hichibang i bawl ngei diing uhi. 4Bang jiahin ahiai i chih leh khatvei suhvaah a um a, vaan silpiah chiamta a, Hagau Siangthou tansah a um a, 5Huleh Pathian thu hoih leh hun hung um diing a silbawltheihnate chiam haw chu, 6A puuh va ahihleh, hute chu kisiih diing a siamthah gual ahi sih uhi; Pathian Tapa chu amahuh tuma kikilhbeh thah leh sumualphou ahihjiahun. 7Ajiahchu lei, a tung a ju guahtui na dawnin, amahuh diing a lou na kihohte diinga anteh louhing neehtheih hung suah in, Pathian apat vangpiahna a mu hi. 8Hizongleh lingkung leh hampa lingnei suahdoh chu deih louh in a um a; huleh haamse dong phial in a um hi; a tawpna chu mei a haal ahi. 9Hizongleh, deihtahte, huchibangin soi mah le’ung, nangun chu huchibang silte sang a hoihzaw leh hutdamna toh kithuahkhawm silte na bawl uh ka hung gingta uhi. 10Ajiahchu a min a na natoh uleh, na lungsiatna suhlat uh, misiangthoute na natohsah va, huleh tua zong na toh zing u’chu mangngilh diingin Pathian chu a dihtatlou sih hi. 11Huleh nanguh kuapouh in, kinepna heetchi ana kim tang diingin, a tawp dongin thanop suah chiat leh u’chin ka hung deih mahmah uhi. 12Na kithahdah louh va, ginna leh kuhkalna jiaha thuchiam gouluahtute umdan juitute na hih uh ka hung deih uhi.
Pathian thuchiamte’n kinepna a umsa
13Bang jiahin ahiai i chih leh Pathian in Abraham kawma thu a chiam laiin, amah sang a lian zawa a kihaahsial theih louh jiahin, amah le amah in a kihaahsial a, 14Tahzetin vang ka hung pe diing a, suhpung zong ka hung supung diing hi, chi'n. 15Huchi'n ama’n kuhkaltaha a thuaah mualsuaah nungin silchiam chu a muta hi. 16Bang jiahin ahiai i chih leh mihingte chu amahuh sanga lianzaw in a kihaahsial veu uh; huleh thu namdetna diing a kihaahsialna chu amahuh diingin kinialna zousiah suhtawpna ahi. 17Hubangin Pathian in silchiam luah diingte kawmah a lunggel kihenkit theih louhdan nasatah a ensah nuam in, huchu kihaahsialna in a sukipta hi. 18Huchu Pathian zuauthei ahih louhna kihengkiit thei lou sil nihte jiaha, eiuh kihumbitna diinga i ma a kinepna kikoih tu diinga taite’n hasotna nasatah i neihna diingun ahi. 19Hu kinepna chu hinna siihka kipin i nei a, chiantah leh kiptah, huleh puanjah sunga luut chu ahi. 20Huah chu Jesu Melkisedek umdan bang a kumtuang a siampu lal a siam in, eiuh diing a ma puitu in ana luut masata hi.
Currently Selected:
HEBRAITE 6: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.