HEBRAITE 5
5
I siampu Lal loupi uh chu
1Ajiahchu siampu lal, mite laha kiladoh photmah chu, sualnate jiaha silpiahte leh kithoihnate a latkhawm theihna diingin, Pathian lam silte a mite a diinga pansah ahi uh. 2Ama’n chu bangmah heloute leh, lamkhialte tungah hehpihna a nei thei hi; ajiahchu amah ngei zong haatlouhna a tuamvelin ana umta hi. 3Huleh hikhu jiahtahin mite a diing a a latsah bangin, sualnate jiahin amah a diing ngei zong a lat a kiphamoh hi. 4Huleh hu paahtawina chu, Aaron a kouh banga Pathian in a kouh loungal, mi koimah in amah diingin a kilaah ngei sih hi.
Melkisedek umdan banga Siampu lal Khrist
5Huchibang mahin Khrist zong siampu lal a siama um diingin amah leh amah a kitawisang sih hi; hizongleh a kawmah Nang chu ka Tapa na hi a, tuni’n ka hung hingkhia ahi, chi a soitu’n a tawisang ahi zaw hi. 6Ama’n mun tuam khat a, Nang chu Melkisedek umdan banga kumtuang a siampu na hi, chia a soi mahbangin. 7Ama’n chu tahsa a a um lai nitein, sihna laha amah huuhhing theipa kawmah naahpitaha kap leh mittui luang pum a haamteina leh ngetnate a lat nungin, Pathian laudan a siam jiahin ngaihkhiah in a um hi. 8Tapa himahzongleh, a silthuaahte haw in thumandan a zilta hi; 9Huleh suhbukima hung um in, a thumangte zousiah diingin kumtuang a hutdamna siamtu ahung hita hi; 10Melkisedek umdan bang a Siampu lal, Pathian chih in a umta hi.
Khristian hinkhua a khanlet a ngaih zia
11Amah tungtaang soi diing tampi ka nei va, na ngaihkhiah peih louh jiahun a soichet zong a hahsa hi. 12Ahun lam ngaihtuah inchu houtute na hihtaah diing uh ahi a, Pathian thubulte khat in ahung hilh kiit ngai na hita uh; huleh angum hilou a nawitui kiphamoh bang na hung hita uhi. 13Nawitui ne photmah chu naungeeh ahih jiahun, dihtatna thu ah heetna bangmah a nei sih uhi. 14Hizongleh angum chu mi pichingte, a ngaihtuahna ah zanga, sialepha hekhen diing a a heettheihna ah sawizoita haw a diing ahi.
Currently Selected:
HEBRAITE 5: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.