HEBRAITE 4
4
Gingtute diinga khawldamna hoihzaw um chu
1Hujiahin i lau diing uh, huchilou inchu a khawldamna a luutna diing thuchiam um zing napi in, na lahva mi khattou chinglou bangin na umkha diing uhi. 2Bang jiahin ahiai i chih leh amahuh kawm a soi a hihbangin, tanchinpha chu i kawma soi ahi a; hizongleh a thu jatute a ginna toh a kizop louh jiahin, a thu jahte u’chu amahun a phattuampih sih uhi. 3Bang jiahin ahiai i chih leh eiuh a gingtasate chu khawldamna ah i luut uhi, Ka lungthah a ka kihaahsial bangin, leilung siam chiil apat nnate tohzohsa hita mahleh, ka khawldamna ah a luut sih diing uh, chia a soi bangin. 4Ajiahchu ama’n mun khat ah ni sagihni thu hichibangin a soi hi, Huleh Pathian in ni sagihni in a natoh zousiah a khawlsanta, chi'n. 5Huleh hi munah, Ka khawldamna a, a luut taah uleh, a chih kiit hi. 6Hujiahin mi khenkhat khawldamna a, a luut diing uh thuchiam a um naahlai jiah leh, nidang a tanchinpha soi masatnate gintaatlouhna jiaha a luut louh jiahin; 7Hun sawttah nungin David zangin, Tuni, chi'n, bang ni ahakhat a guat kiit a, Tuni a a aw na jah uleh, na lungtang uh khauhsah sih un, chi a kisoi bangin. 8Ajiahchu Joshua in amahuh na khawldamsahta hileh, hunungin ama’n ni dang thu a soi sih diing hi. 9Hujiahin Pathian mite a diingin khawldamna khat a um nalai hi; 10Ajiahchu Pathian a natohna apat a khawldam bangin, amah khawldamna a luut in zong a natohte apat a tawpta ahi. 11Hujiahin hu khawldamna a luut diingin i hahpan diing uh, huchilou inchu mi khattou hu gintaatlouhna etsahna bang a um in a puuhkha diing hi. 12Ajiahchu Pathian thu chu a hing a, sil a bawlthei a, namsaau hiamtuah sangin a hiamzaw a, hinna leh hagau, huleh guhtuah leh chintuiguh khen thei khopin a sun thei a, lungtang a ngaihtuahte leh tupte hekhentu ahi. 13Silsiam khat mah amah mitmuha kilang lou mawngmawng a um sih a; a kawma i tanchin i tutna diingpa mitmuh a’chu bangkim saguah leh kihongsa ahi. 14Huchi'n vaante haw a paisuaah Siampu Lal loupitah, Jesu Pathian Tapa i neih jiahin i thugin uh i pomkip diing uhi. 15Ajiahchu i haatlouhnate uh hung thuaahpih pha lou Siampu Lal nei i hi sih a; himahleh eihaw banga lam chintenga heemna tuaahsa, sual ahihleh sual lou, nei i hi zaw uhi. 16Hujiahin khotuahna i tan theihna diing uleh, taahsap hun chianga panpihna diinga hehpihna i muh theihna diingun, haangsantahin hehpihna laltouphah chu i naih diing uhi.
Currently Selected:
HEBRAITE 4: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.