HEBRAITE 3
3
Pathian a khawldamna Khrist, Pathian Tapa chu Mosi sanga loupizaw
1Huchihjiahin, unau siangthou, vaan kouhna tangte haw, i thugin uh Sawlleh leh Siampu Lal, Khrist Jesu chu ngaihtuah un; 2Pathian innsung mite zousiah laha Mosi chu a ginum bangmahin, amah chu amah guattu kawmah a ginum hi. 3Ajiahchu inn sanga a satu paahtawi a, a um zawh bang ngei in, amah chu Mosi sanga loupizaw diing a sim ahita hi. 4Bang jiahin ahiai i chih leh inn chinteng chu mi koi aha khat sah ahi veu a; hizongleh sil zousiah satu chu Pathian ahi. 5Huleh Mosi chu, khonung a thu hung kisoi diingte heetsahna diingin, Pathian innsung mite zousiah lahah, natongtu bangin, a ginum ngei ahi. 6Hizongleh Khrist chu Tapa bangin amah innsung ngei ah a ginum ahi; a tawp dong a i hahkatna uleh i kinepna kipaahna uh i tuuhdet phot uleh, a innsung mite i hi uhi. 7Huchihjiahin (Hagau Siangthou soi bangin, Tunia a aw na jah uleh. 8Gamdaai a heemna ni a a suhlungthah bangun, na lungtang uh khauhsah sih un; 9Hulaiin na pulepate un ahung heem va, ahung ze-et va, huleh kum sawmli sung ka silbawlte a mu uhi. 10Huchihjiahin hu haahte tungah ka lungkimta sih a, huleh, Amahun a lungtang un a ngaihtuahkhial zing va, ka lampite zong a he sih uhi, ka chi a. 11Huchi'n ka lungthahna in ka kihaahsial a, ka khawldamna ah a luut sih diing uhi, chi'n). 12Pilvaang un, unaute, huchilou inchu Pathian hing apat paikhe diingin, na lahva mi khattou sungah ginlouhna lungtang gilou ahung umkha diing hi. 13Hizongleh Tuni, a kichih laiin, khat leh khat kihasottuah zaw un; huchilou inchu na lahva mi khattou sual heemna a suhkhauh in na umkha diing uhi. 14Ajiahchu Khrist tanpihtute a siam i hita a, i ginna kipatna uh a tawpdong a i tuuhdet phot leh; 15Tuni a, a aw na jah uleh, a suhlungthah laiuh bangin, na tungtaang uh khauhsah sih un, chih ahihlai in. 16Ajiahchu khenkhat in, a jah vangun zong a sulungthah uh; ahiinlah Aigupta gam apat Mosi puidohte ahi veh sih uhi. 17Hizongleh kuate tungah ahiai kum sawmli sung lungkim lou a, a um? silbawlsual, gamdai a, a luang uh lumte tungah hilou ahiai mah? 18Huleh a gingta loute kawm loungal, koi kawmah ahiai a khawldamna ah a luut sih diing uh chia a kihaahsial? 19Huchi'n gintaatlouhna jiahin a luut theita sih uh, chih i mu uhi.
Currently Selected:
HEBRAITE 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.