HEBRAITE 2
2
1Hujiahin i thu jahsate ah lungluuttaha phatuam i ngaih sem diing uh ahi, huchilou inchu i tolhmangsah zenzenkha diing uhi. 2Bang jiahin ahiai i chih leh angelte zanga thu kisoi bawn a na kip a, bohsiatna leh thumanlouhna chintengin thuhna dihtattah a muh un chu. 3Huchilawma hutdamna loupi ngaihsah sih lei, bangchi’n ahiai i suaahtaat diing uh? hu hutdamna thu chu a chiilin Lalpa zanga soi pat ahi a, huleh a thu jatute’n i kawmah a sukip uhi. 4Pathian in zong chiamchihnate leh, sillimdangte leh, silmah leh Hagau Siangthou silpiah tuamtuamte in amah deihdan dungjuiin amahuh a heetpih hi. 5Ajiahchu ama’n a tanchin i soi uh, tunung a hung um diing khovel chu, angelte nuaiah a koih sih a. 6Hizongleh mi khat in, khoimun aha ah, Mihing bang ahi a, na ngaihtuah zing? Ahihlouhleh mihing tapa zong bang ahi a, na veh veu? 7Nangma'n amah chu angelte sanga themkhat nuainungzaw in na siam a; loupina leh paahtawina na khuhsah a, na khutsiamte tungah na koihta hi; 8Sil zousiah a thuthu a um diingin a keeng nuaiah na koihta hi, chi'n ana hesahta hi. Ajiahchu sil zousiah a thuthu a um diing a, a nuai a, a koih jiahin, a nuai a, a koih louh bangmah a um sih hi hizongleh tu inchu sil zousiah a nuai a kikoih in i mu nai tadih sih hi. 9Hizongleh Jesu chu, Pathian hehpihna jiaha michin a diinga sihna a chep theihna diing a, sihna thuaahna diing jiah a angelte sanga themkhat nuaizaw a bawl a um a, loupina leh paahtawina khuhsah a um in i mu zaw uhi. 10Bang jiahin ahiai i chih leh a diing a sil zousiah um a, a vang a bangkim umpa a diingin chu, ta tampite loupina a puiluutna a a hutdamna uh siamtu chu gimthuaahnate jala suhbukim hi a kilawm mawng ahi. 11Ajiahchu susiangthoutu leh suhsiangthoute chu khat apat ahi va; hujiahin ama’n amahuh chu unaute chih a zum sih hi, 12Ka unaute kawmah na min ka soiphuang diing a, kouhtuam pawlte lahah la sa in ka hung phat diing hi, chi'n. 13Huleh, Amah ah ka ginna ka nga diing hi, a chi kiit hi. Huleh, En un, kei leh Pathian hung piah naupangte, a chi kiit hi. 14Huchi'n naupangte chu tahsa leh sisan tangkhawm ahih jiahun, amah ngei in zong hubangmah ahung tang hi; sihna jala sihna thuneitu, diabol, a suhmang theihna diingin leh; 15Sih lau jiaha a damsung teng uh suaah a um zousiah haw a suahtaatsah theihna diingin. 16Ajiahchu ama’n angelte limlemeel bang a po sih a, Abraham haahte limlemeel bang a po zaw hi. 17Huchihjiahin mite a diinga sual thuphatawina diinga, Pathian lam silte a siampulal mi khotuah thei leh ginumtah ahih theihna diingin, sil zousiah a, a unaute bangbang a bawl a ahung um chu amah diingin a poimoh him ahi. 18Ajiahchu amah ngei in zong heemna tuaah a ana thuaah taah jiahin, heemna tuaahte chu a panpih thei hi.
Currently Selected:
HEBRAITE 2: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.