HEBRAITE 1
1
Hutdamna loupi chu; Pathian Tapa zawlneite sanga loupizaw
1Pathian, nidanglaia i pulepate kawma lam tuamtuam leh, ze tuamtuam a zawlneite zanga thu na soi pa in, 2Hi ni nunungte ah a Tapa in i kawmah thu a soita hi, amah chu sil zousiah luahtu diingin a guat a, khovelte zong amah mah in a siam hi; 3Amah chu a loupina vaah leh, a umze kibatpih lim ngei hiin, sil zousiah a silbawltheihna mu a tuding in, amah mah in i sualnate a silsiang zoh nungin, tunglama Loupipen jiatlam ah a touta hi.
Pathian Tapa angelte sang a loupizaw
4Angelte sang a minpha zaw a muh bang ngei in, amahuh sanga hoihzaw mahmah a siam ana hita him hi. 5Bang jiahin ahiai i chihleh angelte lahah khoipen kawmah ahiai hi thute soi khaahna ana neih ngei, Nang chu ka Tapa na hi a, tuniin ka hung hingkheta hi, chih leh. Amah diingin Pa ka hi diinga, kei diingin amah chu Tapa ahi diing hi, chih. 6Hulezong, ta masapen khovel a ahung puiluut laiin, Pathian angelte zousiah in amah bia u’heh, a chi hi. 7Huleh angelte tungtaang thu ah chu hichi'n a chi hi, Ama’n a angelte chu huih in a siam a, huleh a natongtute zong mei kuang in a siam hi, chi'n. 8Hizongleh Tapa tungtaang thu chu hichi'n a soi hi, Aw Pathian, na laltouphah chu kumtuang kumtuang in a um diing hi; dihtatna lalchiang zong na gam lalchiang ahi. 9Nangma'n dihtatna na deih a, giitlouhna na hua hi; hujiahin Pathian, na Pathian ngei in nang chu na lawite tung daihah kipaahna thau ahung nuhta hi. 10Huleh, Lalpa, Nangma'n, a chiilin leilung kingahna na phuumta a; huleh vaante zong na khutsuaah ahi; 11Amah u’chu ahung mang diing a; hizongleh nang chu na um zingzing hi; amahuh chu a bawnun puansilh bangin ahung lui diing a; 12Huleh puanthuaah bangin na jial diing a, a kihengta diing uh; hizongleh nang chu a ngeimah na hi a, na kumte’n zong beini a nei sih diing hi, chi'n. 13Hizongleh angelte laha khoipen kawmah ahiai hi thute soikhaahna ana neih ngei, Na meelmate na keeng ngahna a ka siam masiah ka jiatlam ah touin, chih. 14Amahuh haw zousiah chu, hutdamna gouluah diingte natohsah diing a sawldoh natohna hagaute ahi sih viai mah?
Currently Selected:
HEBRAITE 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
