PHILEMON 1
1
Chibaibuuhna leh kipaahthusoina
1Paul, Jesu Khrist mitaang leh, i unaupa uh Timothi in, ka deihtah uleh ka natohpih uh Philemon kawmah, 2Huleh ka deihtah uh Apphia leh ka sepaihpih uh Arkippa kawmah, huleh na inn a kouhtuam kikhawmte kawmah; 3I Pa uh Pathian leh, Lalpa Jesu Khrist akipan hehpihna leh hamuanna na kawmvah um hen. 4Ka haamteinate a na min lou zingzing in ka Pathian kawmah kipaahthu ka soi hi, 5Lalpa Jesu lam leh misiangthoute zousiah lama lungsiatna leh ginna na neihdan ja in; 6Na ginna kikoppihna chu Khrist Jesu a nangmah a um sil hoih chinteng heetkimna lama ahung phattuam theihna diingin. 7Ajiahchu na lungsiatna ah nuamna leh hehnepna loupitah ka nei uhi, bang jiahin ahiai i chih leh nangmah jiahin misiangthoute lungtang a halhta hi, unaupa.
Onesima diinga ngetsahna
8Hujiahin a kilawm hun bawl diing a thu hung piah chu Khrist ah kingam mahmah zong leng, 9Lungsiatna jiahin keimah Paul, teehsepu leh, tu a zong Jesu Khrist mitaang in ka hung ngen zaw ahi. 10Ka kol taanna a ka hinkhiah, ka tapa Onesima a diingin ka hung ngen hi; 11Amah chu tumalaiin nanga diingin a phatuam sih a, hizongleh tuin chu nang leh kei diingin a phatuamta hi; 12Amah chu ka hung sawl kiitta a; hujiahin, ka lungtang peetmah ahi a, kipaahtahin na pom in. 13Amah chu ka tanchinpha kolbuhna a nangmah luang a na hung tohsah diingin ka kawma umdensah ka ut mahmah a; 14Hizongleh na chitna chu chitsah teitei hilou a, na ut thua hih ahihzawh theihna diingin na thu louin bangmah ka bawl nuam sih hi. 15Ajiahchu hun tomkhat sung nang ahung khen chu kumtuang a amah na neih zawh na diing zong ahi meithei hi; 16Ahi’n tuin chu suaah bang a hilou in, suaah sang a hoih, unau deihtah bangin, kei diingin chu deihtuam ahi a, nang diing semin houh, tahsa ah leh Lalpa ah bangchi hih diahkhol a ta’imah? 17Hujiahin na kithuahpih banga na hung geel leh, keimah ngei bangin na pom in. 18Na tunga bawlkhial a neih a, bat bangmah a neih lezong keimah batin na koih in; 19Keimah Paul in hikhu ka khut ngei a ka gelh ahi, keima’n ka ditsah diing hi; ahi’nchu kei kawmah bat na nei a, nangmah ngei zong na kiba chia ka soina ahi sih hi. 20Ahi, unaupa, nang a kuan a nuamna Lalpa ah hung neisah in; Khrist ah ka lungtang hung suhalh in. 21Na thumanna a kimuang in leh, ka soi sanga loupizaw a na bawl diing gingta in na kawmah ka hung gial hi. 22Bang hitaleh kei diingin zong tunna inn khat hung na ngaihtuahsah in; ajiahchu na haamteinate uh jalin na kawmva piah a ka um diing ka gingta hi. 23Khrist Jesu a ka koltaanpih Epaphra in chibai ahung buuh hi; 24Mark, Aristarkha, Dema, huleh Luka, ka natohpihte’n zong. 25I Lalpa uh Jesu Khrist hehpihna na hagau uh kawmah um hen. Amen.
Currently Selected:
PHILEMON 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.