JAKOB 1
1
Thu tuamtuam a thuhilhna pha
1Jakob, Pathian leh Lalpa Jesu Khrist suaah in, nam sawmlenih kithehdalhte chibai a buuh hi. 2Ka unaute, ze-etna chituamtuam na tuaah chiangun nuamna ngenin ngai un; 3Na ginna uh etkhiahna in kuhkalna a siam chih he in. 4Hizongleh, bangmah tasamlou a, na pum va na bukim theihna diingun kuhkalna in tong bukim heh. 5Na lahva koipouh in pilna a taahsap leh, mi zousiah kawma tailou leh it loua petu Pathian kawmah ngen heh; huchi'n a kawmah piah ahi diing hi. 6Hizongleh, ginglel hetlou in ginna nei in ngen heh. Ajiahchu ginglel mi chu tui khang lian kinawh, huih muut leeng lehleh bang ahi. 7Hujiahin, huchibang min chu Lalpa apat bangmah muh kigingta sih heh. 8Lungsim bulbaal nei lou mi chu a silbawl zousiah ah a kip sih hi. 9Daikawmkal a um unau chu paahtawi a, a um jiahin kipaah heh; 10Hizongleh mihausa chu suhneu a a um jiahin kipaah heh; ajiahchu hampa paah banga mang diing ahi hi. 11Ajiahchu, niin a satna toh ahung suaah chiangin, hampa chu a haaivul a, huleh a umdan hoih chu a mangta hi; huchimahbangin mihausa zong a paina ah a vuai diing hi. 12Ze-etna thuaah teitei mi chu a hampha hi, bang jiahin ahiai i chih leh etkhiah a a um zoh chiangin Lalpa’n amah lungsiattute kawma piah a chiam, hinna lallukhuh chu a mu diing hi. 13Mi koimah in heem a a um chiangin, Pathian heem ka hi chi sih heh; ajiahchu Pathian chu giitlouh a heem gual ahi sih a, ama’n zong koimah a heem ngei sih hi. 14Hizongleh michin amah utna a puimang leh hiip a, a um chiangin heem in a um ahi zaw hi. 15Huleh utna in nou a paai chiangin, sual ahung hingkhia a, huleh sualin ahung pichin chiangin sihna ahung hingkhia hi. 16Ka unau deihtahte, heemin um sih un. 17Silpiah hoih leh silpiah bukim photmah chu tunglam a kipan ahi a, vaahte Pa kawm apat hungsuh ahi, amah ah chu lamdanna leh kiheina liim mawngmawng a um sih hi. 18A silsiamte laha a gah masa lawikhat i hihtheihna diingun, a utthu a thutah a ahung hin i hi uhi.
Sahkho dihtah heetna
19Huchihjiahin, ka unau deihtahte, michin ngaihkhiah lamah kilawp henla, thusoi lamah kilawp sih henla, lungthah baih sih heh. 20Ajiahchu mihing lungthahna in Pathian dihtatna a siam sih hi. 21Huchihjiahin bolhhoh zousiah leh giitlouhna dimlet chu koihmang unla, na hinna uh hundam thei thu kipsa chu thunuailuuttahin pom un. 22Hizongleh nanguh leh nanguh kihem in, thu ngaikhetu chauh hilou in, thu juitute hi zaw un. 23Ajiahchu koipouh thu ngaikhia chauh ahih a, a juitu ahih louh inchu, amah chu mi limlang a, a pianpih maai kien bang giap ahi. 24Ajiahchu a kien a, huleh a chiah mang a, bangchibang mi ahih a kimanghilhpah hi. 25Hizongleh koipouh zalenna daan bukim en a, hu a um zing a, mangngilhhaat thungaikhia hilou a, thu tongtu hizaw chu, hu mi chu a natoh ah vangpiah in a um diing hi. 26Na lahva mi koipouh sahkhomitah bang a um a, a lei veeng hoih loua, amah lungtang kihem zaw chu, hu mi sahkho biah chu a thawn ahi. 27Pathian leh Pa mitmuh a sahkho biah siangthou leh buahbaang lou chu, nubei pabeite leh meithaite a gimthuaah lai va veh leh, khovel a niin baang lou a kikoih zing ahi.
Currently Selected:
JAKOB 1: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.