HEBRAITE 13
13
Kihilhna thu tuamtuam
1Unau kilungsiatna umsah zing un. 2Mikhualte hoihbawl diing mangngilh sih un; ajiahchu huchibang bawl in mi khenkhatte’n he loupi in angelte ana zintun uhi. 3Suangkul a kaan a umte chu amahuh toh kaankhawm a um bangin he zing un; huleh suhgentheih thuaahte chu nanguh zong sapum a um na hih jiahun he zing un. 4Mi zousiah lahah kiteenna chu zahbawl in um henla, huleh lupna zong suhbuah louh in um heh; himahleh tohuuhte leh aangkawmte chu Pathian in vai a hawmsah diing hi. 5Na umdan u’chu sumngaihnatna tellou hi heh; na sil neih tungvah lungkim un; ajiahchu ama’n, Bangma chihin ka hung nuse sih diing a, tai zong ka hung taisan sih diing hi, a chi hi. 6Huchi'n haangsantahin, Lalpa chu ahung panpihtu ahi a, ka lau sih diing hi, mihingin bang ahung loh diai? i chi ngam uhi. 7Na tungva thuneitute leh Pathian thu na kawmva soitute chu he zing un; a umdan va sil hung umdohte ngaihtuah unla, a gindan uh jui un. 8Jesu Khrist chu jan ni toh, tuni toh, huleh kumtuang in a ngeimah ahi. 9Thugin tuamtuam leh limdangte tohmangin um sih un. Ajiahchu lungtang hehpihna a suhkip chu a hoih ahi; neeh diing a suhkip diing ahi sih, huchibang lungkhamte’n hute ah phattuamna a mu tuan sih ahi. 10Biahbuuh natongtute’n a neeh theihlouhna uh maitaam i nei uh ahi. 11Siampu lalin sual thoihna diing a mun siangthou a sisan a luutpih veu gante luang haw chu khogei lamah a haalmang veu uhi. 12Huchihjiahin Jesu’n zong, amah sisan ngei a mite a suhsiangthou theihna diingin kulh kotkhaah polamah a thuaahta hi. 13Hujiahin amah a muhsitna uh pua in a kawmah, khogei lamah i chiahdoh diing uh. 14Ajiahchu hitah ah khomundet i nei sih va, khopi hung um diing chu i hawl uh ahi zaw hi. 15Hujiahin amah vangin paahtawina kithoihna chu Pathian kawmah tawplou in i laan diing uhi, huchu a mina i kipaahna phuandohna muuh gahte ahi. 16Hizongleh sil hoih bawl leh silphal chu mangngilh sih un, ajiahchu huchibang kithoihnate ah Pathian a kipaah mahmah hi. 17Na tungva thuneitute thu mang unla, a thuthu un um un; bang jiahin ahiai i chih leh na tungtaang thu uh soi diingte bangin na hagau uh ahung veensah uh ahi, huchu lunggimtah a bawllou a, kipaahtaha a bawl theihna diingun; lunggimtaha a bawl u’chu nanguh diingin a phatuam sih ahi.
Thutawpna leh vangpiahna
18Keiuh diingin hung haamteisah un; ajiahchu sil bangkimah dihtaha gamtat utin sialepha heetna hoihtah ka nei uh chih ka gingta uhi. 19Hizongleh kintaha na kawmva sawl kiit a ka um theihna diingin, huchu ka hung ngen diahkhol hi. 20Tuin hamuanna Pathian, i Lalpa uh Jesu Khrist misi laha kipana kaithoupa, kumtuang thuhunna sisan jala Belaampu loupitah in, 21Jesu Khrist jala a mitmuh a, a deihzawng photmah bawl diingin sil hoih chinteng ah nanguh hung subukim hen; amah kawmah loupina kumtuang kumtuang in umta hen. Amen. 22Huleh unaute, hasotna thu ngai thei teitei diingin ka hung ngen hi; ajiahchu thu tawmtakhat in na kawmvah ka hung gial hi. 23I unaupa uh Timothi hahdoh in a umta chih ana heta un; ahung paipah leh, amah toh nanguh ka hung mu diing hi. 24Nanguh hung heute zousiah leh misiangthoute zousiah chibai hung na buuhsah un. Italy gam a mite’n chibai ahung buuh uhi. 25Na bawnva kawmah hehpihna um hen. Amen.
Currently Selected:
HEBRAITE 13: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.